Yeni Layihəyə start VERİLİB
AzTehsil.com xəbər verir ki, Azərbaycan Respublikasının Elm və Təhsil Nazirliyi ilə Azərbaycan Velosiped İdmanı Federasiyası (AzVİF) arasında imzalanmış əməkdaşlıq çərçivəsində regionlarda velosiped idmanının inkişafını hədəfləyən layihənin icrasına start verilib.
Layihənin ilkin mərhələsi Qəbələ, Quba, Ağdaş, Ağstafa, Goranboy, Tovuz, Gədəbəy və Gəncə şəhərlərini əhatə edir. Bu bölgələrdə fəaliyyət göstərən idman məktəblərində velosiped idmanı bölmələri yaradılıb, uşaqlar müasir velosipedlərlə təmin olunub və məşqlərə başlanılıb. Ümumilikdə 200-dən çox uşaq layihə çərçivəsində keçirilən ilk məşqlərdə iştirak edir.
Layihənin əsas məqsədi regionlarda uşaqlar və yeniyetmələr arasında sağlam həyat tərzinin təşviqi, velosiped idmanına marağın artırılması və istedadlı gənc idmançıların erkən yaşlardan müəyyənləşdirilərək onların potensialının inkişafına dəstək verməkdir.
Gələcəkdə layihənin daha çox regionu əhatə etməsi və ölkə üzrə velosiped idmanının dayanıqlı inkişafına töhfə verməsi planlaşdırılır.
