Polis məktəb direktorları ilə GÖRÜŞÜB

Polis məktəb direktorları ilə görüşüb.

Şəki Şəhər Rayon Polis Şöbəsinin təşəbbüsü ilə rayon ərazisində yerləşən ümumtəhsil müəssisələrinin direktorları ilə görüş keçirilib.

Şəhər 7 saylı tam orta məktəbdə keçirilən tədbirdə Şəki ŞRPŞ-nin, şəhər İcra Hakimiyyətinin, Şəki-Zaqatala regional Təhsil İdarəsinin əməkdaşları və pedaqoji kollektiv iştirak edib. 

AzTehsil.com xəbər verir ki, tədbirdə yeniyetmələrlə iş, şagirdlərin davranış qaydalarına riayət etməsi, dərs prosesindən üzrsüz səbəblərlə yayınması hallarının qarşısının alınması və bu sahədə ailə-məktəb-polis əməkdaşlığının əhəmiyyəti vurğulanıb. 

ŞRPŞ-nin rəisi polis polkovniki Elnur Həsənov çıxışında məktəb ərazilərinə kəsici-deşici alətlərin, qanunla qadağan edilmiş digər əşyaların gətirilməsinin qarşısının alınması, yeniyetmələrin hüquqazidd davranışlardan çəkindirilməsinin və bu istiqamətdə polis əməkdaşları ilə qarşılıqlı əməkdaşlığın gücləndirilməsinin vacibliyini bildirib. O, təhsil müəssisələrində şübhəli halların müşahidə edildiyi təqdirdə polis orqanlarına dərhal məlumat verilməsinin zəruriliyini, eyni zaman məktəblərin müasir müşahidə kameraları ilə təchiz olunmasının təhlükəsizlik baxımından əhəmiyyətini diqqətə çatdırıb.

Tədbirdə narkomaniyanın fəsadları, erkən nikah hallarının qarşısının alınması, eləcə də şagirdlərin internet resurslarından, xüsusilə sosial şəbəkələrdən təhlükəsiz və düzgün istifadə qaydaları barədə də ətraflı məlumat verilib, bu sahədə valideyn nəzarətinin zəruriliyi vurğulanıb.

Daha sonra mövzularla əlaqəli iştirakçıları maraqlandıran suallar ətrafında diskussiya aparılıb, təklif və tövsiyələr dinlənilib.