"Bəlkə heç məktəb bizə lazım deyil?!"- EKSPERT
"Bu, qısacası o deməkdir ki, bizim məktəbə olan güvənimiz ildən-ilə, sinif-sinif azalıb. Bu, qətiyyən obrazlı yanaşma deyil, reallığın tam özüdür. Təsəvvür edin, əvvəllər ancaq son buraxılış sinfində – XI sinifdə oxuyan şagirdlər ali məktəblərə hazırlıq üçün repetitor yanına yollanır, seçdikləri ixtisas qruplarına aid fənləri bir növ yenidən təkrarlayırdılar. Sonradan bu prosesin müddəti bir il də artdı. Artıq X–XI siniflər hazırlıq illəri hesab edildi və repetitorluğun davamlılıq müddətini daha da artırdı".
AzTehsil.com xəbər verir ki, bunu açıqlamasında təhsil eksperti Elmin Nuri deyib. O bildirib ki, müəllimliyin mahiyyətini ancaq repetitorluqda görənlərin böyük əksəriyyəti burada xüsusi pay sahibi oldular:
"Məhz onlar repetitorluğu öz maddi məqsədləri naminə genişləndirərək məktəbi bir institut olaraq sıradan çıxardılar.
Təsəvvür edin, bir məktəbdə işləyən müəllim həmin məktəbi nəzərdə tutaraq: “Əşi, burda nə dərs olacaq ki?! Uşaq müəllim yanına getsin!” – dedi. Adamdan soruşarlar, ay müəllim, bəs sən özün təhsilini bəyənmədiyin həmin məktəbin ştatlı əməkdaşı deyilsənmi? Oranın təhsilini inkişaf etdirmək üçün ştat vahidində yer alan bir personal kimi sən özün nə etmisən?! Hansı təklifləri irəli sürmüsən?!
Təbii ki, heç bir təklif. Çünki sənin üçün sinfində dərs dediyin şagirdlər yalnız sənə bir müəllim kimi yox, məhz repetitor kimi müraciət edəndə maraqlı olub. Bu yanaşma, şəxsi maraqların maarifçi, ictimai dəyərlərdən ucuz tutulması məktəbimizi o hala gətirib çıxardı. İndi buyurun, repetitorluq birinci sinifdən başlayır. Bu nə deməkdir? Bu, bəlkə o deməkdir ki, məktəb bizə heç birinci sinifdən lazım deyil.
