Layihəyə cəlb olunmuş, direktorlarla görüş keçirilib
“İnnovativ məktəb” layihəsinə cəlb olunmuş ümumi təhsil müəssisələrinin direktorları ilə görüş keçirilib.
AzTehsil.com xəbər verir ki, 2025–2026-cı tədris ilində Azərbaycan Respublikası Elm və Təhsil Nazirliyi və “ORT İsrail” məktəblər şəbəkəsinin birgə əməkdaşlığı çərçivəsində Azərbaycan Respublikasının Təhsil İnstitutu tərəfindən həyata keçirilən “İnnovativ məktəb” layihəsinə Quba-Xaçmaz Regional Təhsil İdarəsinin tabeliyində fəaliyyət göstərən Şabran şəhəri Tofiq Abbasov adına 1 nömrəli tam orta ümumtəhsil məktəbi seçilmişdir.
Layihədə region üzrə Xaçmaz şəhəri Cəfər Cabbarlı adına 6 nömrəli tam orta ümumtəhsil məktəbi, Şabran şəhəri Tofiq Abbasov adına 1 nömrəli tam orta ümumtəhsil məktəbi və Quba rayonu Rəhman Məmmədov adına Alekseyevkənd tam orta ümumtəhsil məktəbi iştirak edir.
Görüş zamanı ümumtəhsil məktəblərinin direktorları ilə layihənin məqsəd və vəzifələri, eləcə də gələcək fəaliyyət istiqamətləri müzakirə olunmuşdur.
Qeyd edək ki, layihənin məqsədi seçilmiş ümumi təhsil müəssisələrində müasir təhsil və tədris yanaşmalarını tətbiq etməklə STEAM fənlərinin inteqrasiyası təmin etmək, eləcə də təhsil liderliyinin inkişafı və tədris idarəçiliyində yeniliklərin tətbiqi ilə 21-ci əsr məktəb modelini formalaşdırmaqdır.
