Universitetdə Çin tarixi ilə bağlı mühazirə oxunub
Azərbaycan Dillər Universiteti (ADU) nəzdində fəaliyyət göstərən Konfutsi İnstitutunun yay onlayn mühazirələri çərçivəsində institutun direktoru Rafiq Abbasov “Çin tarixinin qəhrəmanlıq səhifələri” mövzusunda çıxış edib.
AzTehsil.com xəbər verir ki, ADU-dan bildirilib ki, mühazirə Çin xalqının Yaponiyanın hərbi təcavüzünə qarşı müqavimət müharibəsində və İkinci Dünya müharibəsində qələbəsinin 80 illiyinə həsr olunub.
R.Abbasov Çinin 14 illik mübarizəsinin əsas mərhələlərindən, Çin Kommunist Partiyasının vahid milli cəbhə yaratmaqda və partizan hərəkatını təşkil etməkdə rolundan, həmçinin “Yüz alayın döyüşü” və Mancuriya əməliyyatları kimi mühüm hadisələrdən danışıb. O, Azərbaycan xalqının da faşizm üzərində qələbəyə verdiyi töhfələri xatırladıb.
Tədbir çərçivəsində “Küləyin səsi” adlı Çin bədii filmi və Heydər Əliyev Fondunun dəstəyi ilə çəkilmiş “Hədəf Bakıdır. Hitler neft uğrunda döyüşü necə uduzdu” sənədli filmi nümayiş etdirilib.
Çinin Azərbaycandakı səfirliyinin nümayəndəsi Yu Kayven də çıxış edərək müharibənin tarixi əhəmiyyətini və Çin-Azərbaycan dostluğunu vurğulayıb.
