“Uşaqlar ən qısa zamanda əyani təhsilə qayıtmalıdırlar”

YUNİSEF: "Məktəblər sonuncu bağlanmalı və ilk açılmalıdır”

"Biz təhsil böhranı ilə üzləşdik. Pandemiya son 18 ayda demək olar ki, 77 milyon uşağı siniflərdən məhrum edib. Bütün dünyada məktəblilər karantin səbəbi ilə 1,8 trilyon saat fərdi təhsili itiriblər”.

Bu barədə YUNİSEF-in uzunmüddətli fasilədən sonra məktəblərin açılması çağırışı ilə dünya ölkələrinə ünvanladığı müraciətində bildirilir.

Müraciətdə qeyd olunur ki, məktəbə getmək və təhsil almaq hüququ hər uşağın inkişafında, təhlükəsizliyində və rifahında əsas rol oynayır:” Buna baxmayaraq, bir çox ölkələrdə siniflər qapalı qalır, halbuki ictimai yığıncaqlar restoran və idman salonlarında keçirilməkdə davam edir. Bu nəsil uşaq və gənclər artıq təhsillərində fasilələrə yol verə bilməzlər, buna görə də biz hökumətləri ən qısa müddətdə "Məktəbə qayıdışa” ( # ReopenSchools) və təhsili düzgün istiqamətə qaytarmağa çağırırıq”.

"Uşaqlar ən qısa zamanda əyani təhsilə qayıtmalıdırlar”

Beynəlxalq təşkilatın müraciətində bildirilir ki, şagirdlərin təhsil alması, sağlamlığı və rifahı üçün məktəblərin bağlanmasının zərəri böyükdür: "Məktəblərin bağlanmasının hər bir uşaq, onun ailəsi, cəmiyyət və iqtisadiyyat üçün nəticələri illərlə hiss olunacaq. Bir çox uşaq heç vaxt yetişməyəcək. Məktəblərin bağlanması hər uşağa, lakin ən həssas uşaqlara daha çox təsir göstərir. Bəzi şagirdlər məktəblərin bağlanması zamanı məsafədən təhsil ala bildilər, lakin onların çoxu dəstəyin olmaması səbəbindən çətinlik çəkirdilər. Dünyada məktəblərin bağlanması zamanı şagirdlərin ən azı üçdə birinin ümumiyyətlə distant təhsil almaq imkanı yox idi”.

Qeyd olunur ki, məktəblərin bağlanması təhsilalanların fiziki fəaliyyətinin azalması, daha pis qidalanma, narahatlıq və özünə zərər vermə səviyyəsi, məişət zorakılığına məruz qalma ilə nəticələndi: "Bir çox uşaq üçün məktəbin alternativi uşaq əməyi, uşaq nikahı və yeniyetmə hamiləliyidir. Bu, baş verdikdən sonra qızlar və ya oğlanlar məktəbə qayıda bilməyəcəklər. Uşaqlar evdə qaldıqları üçün valideynlər xüsusilə ailə şəraitinə görə tətil siyasətinin olmadığı və ya məhdud olduğu ölkələrdə öz işlərini tərk etməyə məcbur olurlar”.

YUNİSEF bir daha diqqətə çatdırır ki, Ümumdünya Səhiyyə Təşkilatı məktəblərin yalnız ən fövqəl hallarda bağlanması məsələsinə baxmağı, həm də yalnız müvəqqəti tədbir kimi gözdən keçirməyi tövsiyə edir.

"Bu aydındır: hökumətlər məktəblərin dəstəklənməsinə prioritet diqqət yetirməli və təhlükəsiz açılış üçün bütün mümkün tədbirləri görməlidirlər. Növbəti nəslin gələcəyi bundan asılıdır. Məktəblər sonuncu bağlanmalı və ilk açılmalıdır”,-deyə YUNİSEF-in müraciətində qeyd olunur.

Oruc MUSTAFAYEV