Gənc məktəb direktorunun uğurları: 13 tələbə, 644 bal göstərici,QIZIL MEDAL və attestatlar…

Hər bir orta məktəbin uğuru direktorla yanaşı, pedaqoji kollektivin də üzərinə böyük məsuliyyət yükü qoyur. Müasir məktəb modelini formalaşdırmaq istəyən kollektiv ilk növbədə intellektual qabiliyyət və düşüncəsi ilə fərqlənməlidir. Bu mənada hər bir məktəbin xüsusi nailiyyətlər əldə etməsində, pedaqoji heyətin əməyi əvəzsiz sayılmalıdır. Məktəblərdə müəllimlərlə şagirdlər arasında səmimi münasibətin yaranması, onların direktor və müəllimlərlə səmimi münasibətdə olub fikirlərini, ən əsası, üzləşdiyi çətinlikləri açıqlaya bilmələri önəmli məqamlardandır. Əlbəttə, bütün bunların nəticəsində o məktəbin işi yaxşı qurulmuş halda, uğurları da saysız-hesabsız olacaq. Məktəbdə ən ümdə məsələlərdən biri də müəllimlərin bilik və bacarıqlarının artırılması istiqamətində atılacaq addımlardır ki, bu da olduqca zəruri hesab edilmədir.

13 şagird tələbə adını qazandı, 644 bal…

Bu gün respublikamıza bir neçə alim, vəkil, jurnalist, dövlət xadimi, ictimai xadim, zabit və digər yüzlərlə ziyalı bəxş etmiş Bünyədəli Pələngov adına Lerik Rayon Züvüç Kənd Tam Orta Məktəbi özünün ənənəvi yolunu davam etdirməkdədir. Lerik rayonunun nümunəvi məktəbi hesab edilən Züvüç Kənd Tam Orta Məktəbinin 19 məzunundan 13-ü bu il tələbə adını qazanıb. Məktəbin bir nəfər abituriyenti isə 644 bal toplayaraq respublikanın ən aparıcı təhsil ocaqlarından birinə qəbul olub. Həmçinin, məktəbin ən yüksək bal göstərən şagirdi respublika fənn olimpiadasında tarix fənni üzrə respublika üçüncüsü olmaqla bürünc medala layiq görülüb. Məktəbin məzunu Səmədli Zaur Abbasqulu oğlu Təhsil Nazirinin əmrinə əsasən, Qızıl Medala layiq görülmüş, həm də qızıl attestat almışdır. İki məzun isə fərqlənmə attestatı almışdır. Fəaliyyətə başladığı dövrdən bu günədək daim belə nəticələri əldə etmək üçün çalışan məktəbin gənc direktoru Sahil Ağayev hər zaman rəhbəri olduğu qurumda işi yüksək səviyyədə təşkil etməklə, şagirdlərin bilik və bacarıqlarını müşahidələr əsasında təhlil edərək müxtəlif tədbirlər görüb, addımlar atıb. Züvüç Kənd Orta Məktəbində ən yüksək pedaqoji meyarlardan biri müəllimlər arasında sağlam rəqabət mühitinin formalaşdırılması, hər bir müəllimin dərs dediyi şagirdlərin daha yüksək nailiyyətlər əldə etməsinə çalışmasıdır. Bu isə ümumilikdə, məktəbin uğurlarının yüksəlməsinə şərait yaradan amildir.

Uğurun sirri…

2012-ci ildə Prezident İlham Əliyevin müvafiq Sərəncamı ilə tikilib istifadəyə verilən məktəb uğurlara və qazanılan nailiyyətlərə görə, adı hər zaman öndə çəkilməklə yanaşı məktəbin direktoru və pedaqoji kollektivi Lerik Rayon İcra Hakimiyyəti və Təhsil Şöbəsinin rəhbərliyi tərəfindən fəxri fərmanlarla təltif edilib. Məktəbdə müəllim və şagirdlərlə işin düzgün qurulması ilə yanaşı, valideynlərlə səmərəli əməkdaşlıq da təmin olunur. Tez-tez valideynlərlə görüşlər keçirilir, onların fikir və təklifləri dinlənilir. Hər bir valideynin fikri dəyərli hesab olunur. Bəzən valideynlərin fikir və təklifləri müəyyən məsələlərin müsbət həllinə kömək edir. Çünki şagirdin təlim-tərbiyəsi valideynlə əməkdaşlıq çərçivəsində qurularsa, məktəblinin nailiyyətləri daha da yüksələr, bu da məktəbin adının yüksəlməsinə təsir edər.

Direktor Sahil Ağayevin təşəbbüsü ilə məktəbdə şagirdlərin milli-mənəvi dəyərlər əsasında tərbiyə olunması işinə də xüsusi diqqət yetirilir. Bu məqsədlə məktəbdə çoxsaylı maarifləndirici tədbirlər keçirilir, şagirdlərin iştirakı ilə müxtəlif bədii proqramlar təqdim olunur.

27 yaşında direktor olan Sahil Ağayevin əsas amalı

27 yaşında məktəb direktoru təyin olunan S. Ağayev təhsil müəssisəsinin uğurları və qarşıda durun planlarla bağlı sualımıza cavab olaraq deyir ki, direktor təyin olunduğu bu illər ərzində hər zaman məktəbin adını uca tutmaq, təhsil keyfiyyətini daha da yüksəltmək, uğurlarını artırmaq, il-ildən tələbə adını qazanan şagirdlərin sayını çoxaltmaq üçün kollektivlə birgə çalışır, ümumi işin xeyrinə uzun illərdir bu məktəbdə fəaliyyət göstərən peşəkar pedaqoqların təcrübəsindən də yararlanır:

"Bütün fəaliyyətimdə daim Heydər Əliyevin "Təhsil millətin gələcəyidir” devizini əsas tutur, ölkəmizin gələcəyinə daha sağlam, bilikli, əsl vətəndaş olan şagirdlər yetişdirməyi amal olaraq seçirəm. Azərbaycanda təhsilə daim yüksək diqqət olub. "Mən dünyada müəllimdən yüksək ad tanımıram” deyən ulu öndər Heydər Əliyevin təhsillə bağlı qoyduğu ənənələr Prezident İlham Əliyev tərəfindən uğurla davam etdirilir. Bu gün dövlət başçısı məktəblərin inşası, yenidən qurulması, təhsil səviyyəsinin yüksəldilməsi, şagirdlərimizin daha yaxşı təhsil alması istiqamətində mühüm addımlar atır. Biz müəllimlər də yaradılmış bu gözəl şəraitdə üzərimizə düşən vəzifəni layiqincə yerinə yetirməyə çalışırıq. Rəhbərlik etdiyim məktəbdə son illər təhsilin keyfiyyəti sürətlə yüksəlir, qəbul imtahanlarında əldə etdiyimiz göstəricilər də buna sübutdur. Əminəm ki, bu göstəricilər hər il daha da yüksələcək. Biz xalqımızın, ölkəmizin gələcəyi naminə bu gün müəllim adına yaraşan şəkildə üzərimizə düşənləri edirik. Məktəbimizdə tədris imkanlarının genişləndirilməsi, şagirdlərimizin daha keyfiyyətli təhsil almaları üçün yaradılan şəraitə görə Prezident İlham Əliyevə təşəkkür edir, bu yolda müəllim kimi üzərimizə düşən işi layiqincə yerinə yetirəcəyimizə əmin edirik”, – deyə gənc direktor qeyd edib. azinforum.az

Məqalə Göndər