38 saylı tam orta məktəbdə davamiyyətlə bağlı açıqlama
Sosial şəbəkələrdə Yasamal rayonunda yerləşən Aytəkin Məmmədov adına 38 saylı tam orta məktəbdə davamiyyətlə bağlı qeydlərin ənənəvi kağız jurnalda aparıldığı iddia edilib. İddialara əsasən, sentyabr-oktyabr aylarında davamiyyət qeydləri şagirdlərin 90 faizindən çoxunun bu müddət ərzində dərsə qatılmadığını göstərir.
AzTehsil.com- n əldə etdiyi məlumata görə Məktəbin rəhbərliyindən bildirilib ki, 2025-2026-cı tədris ilindən etibarən paytaxt üzrə digər ümumtəhsil müəssisələrində olduğu kimi 38 nömrəli tam orta ümumtəhsil məktəbində də elektron jurnallar tətbiq olunur. Təhsilalanların qiymətləndirməsi və digər müvafiq qeydlər "Rəqəmsal məktəb" platforması üzərindən aparılır.
Bir sinifdə müəllim öz təşəbbüsü ilə formativ qiymətləndirmə jurnalından istifadə edib. Bununla bağlı həmin sinfin müəllimləri ilə maarifləndirmə işi aparılıb.
Elektron jurnalların tətbiq edilməsinin əsas məqsədinin qiymətləndirməni rəqəmsallaşdırmaq, valideyn-məktəb əlaqəsinin daha əlçatan olmasını təmin etməkdən ibarət olduğu bir daha diqqətə çatdırılıb.
Qeyd edək ki, rəqəmsal platformada şagirdlər dərs cədvəllərini izləyə, valideynlər istədikləri zaman övladlarının qiymətləri ilə tanış ola bilirlər.
