Qusar rayonunun Cibir kəndində yeni məktəb binası istifadəyə verilib
Qusar rayonunun Cibir kəndində yeni məktəb binası istifadəyə verilib.
AzTehsil.com xəbər verir ki, Qusar rayonunun Cibir kəndində inşası tam başa çatdırılan 264 şagird yerlik tam orta ümumtəhsil məktəbinin binası istifadəyə verilib.
Tədbirdə Elm və Təhsil Nazirliyinin aparat rəhbəri Mətin Kərimli, Qusar Rayon İcra Hakimiyyətinin başçısı Sahir Məmmədxanov, Milli Məclisin deputatı Azər Badamov, Quba-Xaçmaz Regional Təhsil İdarəsinin müdiri Coşqun Əliyev, rayonun hüquq-mühafizə orqanlarının rəhbərləri, təhsil sektorunun əməkdaşları, müəllimlər, şagirdlər və şəhid ailələri iştirak ediblər.
Yeni məktəb binasının açılış mərasimində çıxış edən rəsmi şəxslər – 15 Sentyabr Bilik Gününün önəmini vurğulayaraq, bu əlamətdar gündə istifadəyə verilən yeni məktəb binasının regionda təhsilin inkişafına böyük töhfə verəcəyini qeyd ediblər. Çıxışlarda, həmçinin, Prezident İlham Əliyev və Birinci vitse-prezident Mehriban Əliyeva tərəfindən təhsil sahəsinə göstərilən xüsusi diqqət və qayğının nəticəsi olaraq ölkə üzrə müasir tipli məktəblərin inşasının geniş vüsət aldığı, bunun da gənc nəslin keyfiyyətli təhsil alması üçün mühüm imkanlar yaratdığı vurğulanıb.
Çıxış edən şəhid ailələrinin üzvləri də onlara göstərilən yüksək diqqət və qayğıya görə dövlət rəhbərliyinə minnətdarlıqlarını bildirib, yeni təhsil ocağının istifadəyə verilməsinin gələcək nəsillərin savadlı və vətənpərvər ruhda yetişməsi baxımından böyük əhəmiyyət daşıdığını qeyd ediblər.
Müasir standartlara uyğun tikilən məktəb binasında şagirdlərin tədris prosesini yüksək səviyyədə davam etdirməsi üçün hər cür şərait yaradılıb. Təhsil ocağında 13 sinif otağı, 1 məktəbəqədər hazırlıq otağı, 2 laboratoriya otağı, 2 texnologiya otağı, 1 informatika kabineti və 1 hərbi hazırlıq kabineti fəaliyyət göstərəcək.
Bundan əlavə, məktəbdə 1 ədəd kitabxana oxu zalı, 84 yerlik akt zalı, 1 yeməkxana, 1 idman zalı və 1 açıq idman meydançası da istifadəyə verilib.
Yeni təhsil müəssisəsinin istifadəyə verilməsi Cibir kəndi və ətraf yaşayış məntəqələrində yaşayan şagirdlərin keyfiyyətli təhsilə çıxışını təmin edəcək, onların intellektual, fiziki və sosial inkişafına mühüm töhfə verəcək.
