Tovuzda bağçada uşaqların menyusu ilə bağlı narazılıq – Araşdırmalar başlayıb
Tovuz rayonu Abulbəyli kənd 2 nömrəli körpələr evi-uşaq bağçasında uşaqların menyuda nəzərdə tutulmayan formada qidalandırıldığı iddia edilir.
AzTehsil.com xəbər verir ki bu barədə “Azərbaycan müəllimi” qəzetinə valideynlərdən daxil olan müraciətdə bildirilir ki, bağçada uşaqlara axşam yeməyi olaraq yalnız ayran və çörək verilir.
Valideynlərin sözlərinə görə, məsələnin mahiyyətini öyrənmək istəyən valideynlərə bağçada yalnız “qış menyusu” təqdim edilib, onlar başqa menyularının olmadığını açıqlayıblar.
Şikayətdə həmçinin bağçaya iki aydır ki, unun verilmədiyi, uşaqlara nəzarətin zəif olduğu iddia edilir.
Məsələ ilə bağlı Tovuz-Qazax Regional Təhsil İdarəsi “Azərbaycan müəllimi”nə açıqlama verib. Qurumdan bildirilib ki, artıq körpələr evi-uşaq bağçasında araşdırmalara başlanılıb və nəticələr araşdırma tamamlandıqdan sonra ictimaiyyətə açıqlanacaq.
