Ölkə birincisi Aytac....- ƏTRAFLI
Ölkə birincisi Aytac olimpiadalarda 4 medal qazanıbmış...
AzTehsil.com- n əldə etdiyi məlumata görə bu il III ixtisas qrupu üzrə keçirilən qəbul imtahanında ölkəmizdə ən yüksək nəticəni Sumqayıt şəhəri Təbiət elmləri təmayüllü gimnaziyanın məzunu Aytac Baxşəliyeva göstərib. Aytac imtahanın birinci mərhələsində 294.8 bal, ikinci mərhələsində isə 397 bal olmaqla ümumilikdə 691.8 bal toplayaraq III ixtisas qrupu üzrə ən yüksək nəticəni əldə edən abituriyent olub.
Aytac uğurlarının əldə edilməsində ilk növbədə müəllimlərinin böyük rolu olduğunu qeyd edir.
Ölkə birincisi məlumat verir ki, gimnaziyada təhsil aldığı müddətdə Azərbaycan dili və ədəbiyyat fənni üzrə 4 dəfə Respublika Fənn Olimpiadasında iştirak edib, 2 qızıl, 1 gümüş və 1 bürünc medala layiq görülüb: “Dəfələrlə “Xəmsə”, “Breyn rinq”, “Nə? Harada? Nə zaman?” intellektual yarışlarında iştirak etmişəm və birincilik əldə etmişəm. Sevimli məşğuliyyətim bədii əsərlər oxumaqla yanaşı, musiqi dinləmək, maraqlı filmlər izləmək, yürüş etməkdir”.
Uğurlu abituriyent bildirir ki, birinci olmaq deyil, hər zaman özgüvənli, işinin peşəkarı olmaq arzusu ilə yaşayıb. Bununla belə, Aytac birinci olacağına da hər zaman inanıb: “Uğurlu olmağın səbəbi çox çalışmaq, hədəfə doğru getmək, məqsədinə çatmaq üçün əlindən gələnin ən yaxşısını təqdim etməkdir”.
Hüquqşünas olmaq istəyən Aytac gələcəkdə təhsilini xarici ölkədə davam etdirməyi, layiqli və peşəkar hüquq işçisi olmağı arzulayır. Şagirdlərə tövsiyəsi isə odur ki, arzularının yolunda yorulmadan çalışsınlar: “Zəhmət çəkən insan mütləq istədiyinə nail olur”.
