Bakıda beş məktəbdə direktor vəzifəsi metodistlərə həvalə edilib

Bakı Şəhəri üzrə Təhsil İdarəsinin (BŞTİ) tabeliyindəki 5 ümumi təhsil müəssisəsinin direktoru vəzifəsi Təlimə Dəstək Mərkəzinin metodistlərinə həvalə edilib.

Bu barədə BŞTİ-dən məlumat verilib. Məktəb rəhbərliyi vəzifəsinin metodistlərə həvalə edilməsinin əsas məqsədi BŞTİ-nin tabeliyindəki ümumi təhsil müəssisələrinin idarəetməsinə müasir təhsil proqramlarının tələblərinə əsaslanan metodist (mentor) dəstəyi vermək və məktəblərdə keyfiyyətin təmin edilməsinə nail olmaq üçün müvafiq istiqamətlər üzrə daha yaxından metodiki yardım göstərməkdən ibarətdir.

Həmçinin ümumi təhsil müəssisələrində pedaqoji prosesin sistemli idarə olunmasının dəstəklənməsi, yeni yanaşmaların məktəblərdə çevik tətbiqinin təmin olunması, məktəbdaxili və məktəblərarası öyrədici mühitin zənginləşdirilməsi, təlimin keyfiyyətinin artırılması və fənn metodbirləşmələrinin fəaliyyətinin düzgün istiqamətləndirilməsi də əsas hədəflərdəndir.

Qeyd edək ki, 144 nömrəli məktəbin direktoru vəzifəsi İlahə Həmidovaya, 101 nömrəli məktəbin direktoru vəzifəsi Səkinə Hüseynovaya, 285 nömrəli məktəbin direktoru vəzifəsi Çinarə Cəbrayılovaya, 290 nömrəli məktəbin direktoru Kunzala Həmidovaya, 107 nömrəli məktəbin direktoru vəzifəsi Səidə Əhmədovaya həvalə olunub.

Məqalə Göndər