Pandemiya xəstəxanasının pediatrı: “Koronaviruslu uşaqlara antibiotik təyin edilmir” - MÜSAHİBƏ

Uşaqların koronavirusa yoluxmamağına dair inamın böyük olmasına baxmayaraq, bu halla daha çox rastlaşırıq. Üstəlik, bəzi hallarda uşaqlar xəstəliyi daha ağır keçirirlər. Eyni zamanda, onlar xəstəliyin asemptomatik gedişi halında təhlükəli infeksiya daşıyıcısı kimi təhlükə yaradırlar.

Pandemiya xəstəxanasının həkimi, pediatr-reanimatoloq, neonatoloq Nazilə Hüseynova Media.Az-la koronavirus infeksiyasına yoluxmuş uşaqların müalicəsi ilə bağlı təcrübələrini paylaşıb.

-Ümumiyyətlə, uşaqlar koronavirusu necə keçirirlər?

- Uşaqların çoxu xəstəliyi asemptomatik və ya yüngül formada rahat keçirir. Simptomlara gəldikdə, uşaqlarda 38 dərəcəyə qədər hərarət ola bilər. Ancaq, əsasən, uşaqlarda xəstəlik mədə-bağırsaq xəstəliyi fonunda davam edir, yəni, özünü qarnın pozulması (diareya) şəklində göstərir. Daha az adi öskürək, böyük uşaqlarda boğucu öskürək meydana gəlir. İmmunitetin inkişaf xüsusiyyətlərinə görə, üç yaşınadək uşaqlar xəstəliyə daha dözümlü olurlar.

- Xəstəliyin bütün bu təzahürləri spesifik müalicə tələb edirmi?

- Koronaviruslu uşaqlara antibiotik təyin olunmur. İmmuniteti artıran şərbətlər və multivitaminlər, xüsusən də C, D vitaminləri, həmçinin sink təyin edilir. COVID-19 xəstəsi ilə təmasda olan sağlam uşaqlara da profilaktik tədbir kimi bu vitaminləri qəbul etmələri tövsiyə olunur.

- Uşaqlar koronavirus xəstəliyini ağır keçirə bilər? Belə xəstələriniz olubmu?

- Bəli, bu immuniteti zəif olanlar, D vitamini çatışmazlığı və xroniki xəstəlikləri olanlar, eləcə də erkən doğulmuş körpələrdə olur, baxmayaraq ki, ümumiyyətlə praktikada bu cür hallar nadir olur.

Altı yaşınadək ağır xəstə olan uşaqlarda ən çox görülən simptomlar hərarət, güclü öskürək, ürək bulanması və mədə-bağırsaq fəaliyyətinin pozulmasıdır. Böyük uşaqlarda, xüsusən on yaşdan yuxarı olanlarda bunlara qoxu və ya dad itkisi, baş ağrısı, halsızlıq, iştahanın azalması şikayətləri də əlavə olunur.

- Uşaqların maska taxmağının nə dərəcədə uyğun olub-olmaması barədə cəmiyyətdə çoxlu fikir ayrılıqları var...

- Bir yaşdan kiçik uşaqlara maska taxmaq olmaz, amma bir yaşdan sonra mütləqdir! Çünki adətən onlar COVID-19-u asemptomatik daşıyırlar və başqalarına yoluxdura bilərlər. Çox vaxt valideynlər övladının xəstə olduğunu bilmir, onunla ictimai yerlərdə gəzirlər. Uşaqlar daşıyıcı sayılır, buna görə də maska taxmaları lazımdır.

Məqalə Göndər