1 sentyabr nostalgiyası – “O günün başqa ab-havası vardı, heç görmədim ki, 15 sentyabrda...”

"Hamı uzun illər "Bilik günü”nün sentyabrın 1-də qeyd edilməsinə alışmışdı. Belə qəfil dəyişikliyin məqsədini başa düşmədik. Axı, bu nəyə lazım idi?! İndi də hamı bu günün ayın 1-i qeyd olunmasını istəyir. Mən heç 15 sentyabrda dərs ilinin başlamasına sevinən görməmişəm”.

Bu sözləri AzEdu.az-a açıqlamasında müəllim Kəmalə Abıyeva deyib. O, "Bilik günü” tarixinin illər əvvəl dəyişdiyi haqda danışarkən, bunun hətta şagirdlərin məktəbə həvəsinin azalmasına səbəb olduğunu deyib:

"Dərslər sentyabrın 1-i başlayanda ilk dərs gününü həvəslə gözləyirdik. İndi isə vəziyyət dəyişib. Uşaqlarda məktəbə sevgi azalıb. Mən 40 ildir, məktəbdə çalışıram və bunu hər gün hiss edirəm. İndi uşaqlar dərsin başlanmasında o qədər də maraqlı deyillər.

Dərsdən qaçıb repetitorun yanına getmək məktəbə güvənməmək hissini formalaşdırıb. Düşünmürəm ki, bunun günahkarı yalnız müəllimlərdir. Burada valideynin də günahı az deyil. Valideynə deyirik ki, şagirdi məktəbə gətir. O isə övladına deyir ki, müəllim tutacam, oxuyacaqsan. Ö özü uşağında bu fikri formalaşdırır. Başa düşmür ki, uşaq məktəb ab-havası ilə yaşamalıdır. Məktəb bilik verir. Bilik isə gözəllik, mənəvi zənginlik, düşüncədir. Nəticədə bilik almaq şəxsiyyət olmağın təməlidir. Belə edib uşaqları bundan uzaqlaşdırırıq”.

O qeyd edib ki, "Bilik günü” şagirdlərdə məktəb haqda ilkin təəssürat formalaşdırır:

"Məncə dərslərin sentyabrın 1-də başlanması daha yaxşı idi. Onun ayın ortasında keçirilməsi mənə də qəribə gəlir. Əvvəlki nəsillər məktəbə 1 sentyabrda getdiyinə görə, indi də həmin tarixdə o hissləri bölüşürlər. Hətta ayın 15-nə keçirilməsinə baxmayaraq bir-birilərini o tarixdə təbrik edənlər də olur. Dərs ili çox ölkələrdə yenə sentyabrın 1-də başlanır. Yalnız biz bunu sentyabrın 15-ə keçirmişik.

Bilik gününün qeyd olunması çox yaxşı haldır. "Bilik günü” deyəndə uşaq məktəbi bilik verən müəssisə kimi təsəvvür edir. Şagird I sinfə gələndə ona bu günün mahiyyətini, ab-havasını təlqin edirik, artıq onda bu təəssürat formalaşır. Məncə, bu günü böyük təntənə ilə qeyd etməliyik”.

Onun sözlərinə görə, məktəblərdə Bilik günü eyni, şablon ssenarilərlə keçirilir:

"Bizim məktəbdə isə əvvəlki məzunlar da tədbirə dəvət olunur. Bu, fərqli yanaşmadır. Karyerasında uğur əldə edən məzunlar şagirdlərə nailiyyətlərindən danışırlar. Heç bir fəaliyyəti olmayanlar belə tədbirə gəlirlər. Çox vaxt hətta çıxışlar da şablon olur. Onu daha fərqli etmək olar. Təklif edirəm ki, alimlərin məktəb həyatından maraqlı nəsə danışsınlar”.

Hər il deyirlər ki, ilk dərsdə filan mövzunu keçin. Razıyam, ilk dərsdə Vətən, Cümhuriyyətlə bağlı məlumat lazımdır. Amma ilk günü təhsilin verdiyi biliklə uğur qazananlar, biliyin apardığı zirvələr haqda motivasiyaedici nələrsə danışmaq olar”.

Kəmalə Abıyeva vurğulayıb ki, dərslərin 15 sentyabrda başlanması sanki insanları ruhdan salıb:

"Ümumilikdə, hamı "Bilik günü”nün sentyabrın 1-i qeyd edilməsinə uyğunlaşmışdı. Belə qəfil dəyişikliyin məqsədini başa düşmədik. Bilmədik ki, bu nə məqsəd güdürdü? Belə dəyişikliyə səbəb nə idi? Axı, bu nəyə lazım idi? Dərsə ayın əvvəli başlayıb sonu bitirirdik. Sanki bu, bizə mənəvi təsir etdi və ruhdan düşdük. İndi də hamı ayın 1-i qeyd olunmasını istəyir. Mən heç buna sevinən görməmişəm. Məktəbə kim gəlir, deyir ki, niyə Bilik gününün tarixini dəyişdilər”.