DİM Direktorlar Şurasının sədri Məleykə Abbaszadə mətbuat konfransı keçirib

Dövlət İmtahan Mərkəzinin Direktorlar Şurasının sədri Məleykə Abbaszadə iyulun 30-da 2018/2019-cu tədris ili üçün Azərbaycan Respublikasının ali təhsil müəssisələrinə qəbul olmaq üçün ixtisas seçimi prosesinin başlanmasına həsr olunmuş mətbuat konfransı keçirib

Konfransda kütləvi informasiya vasitələrinin 30-dək nümayəndəsi iştirak edib.

Qeyd olunmuşdur ki, ali təhsil müəssisələrinə qəbul olmaq üçün ixtisas seçimi internet vasitəsilə aparılır və "Abituriyentin elektron ixtisas seçimi ərizəsi” linki günün ikinci yarısından etibarən aktiv ediləcəkdir. Elektron ixtisas seçimi ərizələrinin təsdiqi avqustun 13-dək davam edəcəkdir.

Məleykə Abbaszadə 2018/2019-cu tədris ili üçün Azərbaycan Respublikasının ali təhsil müəssisələrinə tələbə qəbulu müsabiqəsində iştirak etmək üçün ixtisas seçimi elanı, "Abituriyentin elektron ixtisas seçimi ərizəsi”nin doldurulma qaydası, ali təhsil müəssisələrinə qəbul aparılan ixtisaslar, dövlət sifarişi ilə tələbə qəbulunun proqnozunun dərc edildiyi Abituriyent jurnalının 4-cü buraxılışı, eləcə də abituriyentlərə kömək məqsədilə nəşr olunan "İxtisas seçimi zamanı nələrə diqqət yetirməli?” vəsaitləri haqqında məlumat verib. Sədr bildirib ki, II və III ixtisas qrupu üzrə imtahan verən abiturieyntlər üçün müvafiq vəsaitlər gün ərzində nəşr olunacaq və abituriyentlərin ixtiyarına veriləcəkdir.

M. Abbaszadə sonda KİV nümayəndələrinin suallarını cavablandırmışdır.