Koreyalı tələbələr Azərbaycan Dillər Universitetində
Koreyanın Chonbuk Universitetinin 11 tələbəsi və bir müəllimi Azərbaycan Dillər Universitetində (ADU) olub. Universitetlərarası əməkdaşlıq çərçivəsində həyata keçirilən səfərin əsas məqsədi Azərbaycanın tarixi və mədəniyyəti ilə, eyni zamanda, ölkəmizin gəzməli-görməli və tarixi yerləri ilə tanışlıqdır.
ADU-dan bildiriblər ki, universitetin regionşünaslıq kafedrasının baş müəllimi Hökümə Abbasova əcnəbi tələbələrə Azərbaycanın tarixi və mədəniyyəti haqqında ingilis dilində mühazirə oxuyub. Mühazirədə Azərbaycanda ilk insan məskənləri, dövlətlər, Dağlıq Qarabağ problemi, Azərbaycanın qan yaddaşı olan 20 Yanvar və Xocalı faciələri, müasir tariximiz haqqında geniş məlumat verilib.
Qeyd edək ki, koreyalı tələbələr yanvarın 26-da H.Abbasova və ADU-nun Koreya Mədəniyyət Mərkəzinin müdiri Bahar Əliyevanın müşayiəti ilə Qobustan Milli Tarixi-Bədii Qoruğu, eləcə də "Yanardağ” Dövlət Tarix-Mədəniyyət və Təbiət Qoruğunda olublar.
