Xəbərlər / Ekspert
02 dekabr 2019
1 545
Nadir İsrafilov: “Təhsil Nazirliyi yanında İctima Şura cəmiyyətə açıqdır və maraqlı tərəflərlə dialoqa hazırdır”
Əsasnaməmiz təsdiq olunub, Fəaliyyət planımız əsasən tamamlanıb, müvəqqəti və daimi komissiyalrımız müəyyənləşib. Bu günlərdə KİV əməkdaşları və sosial media nümayəndələri ilə görüş keçirməyi planlaşdırırıq.
Geniş içtimaiyyət fəaliyyətimizin konkret istiqamətləri ilə yaxından tanış olmaq imkanı əldə edəcəklər. Nailiyyətlərimiz danılmazdır, ancaq gözləntilərimiz də başa düşüləndir. Təhsil Nazirliyi yanında İctima Şura cəmiyyətə açıqdır və maraqlı tərəflərlə dialoqa hazırdır.
AzTehsil.com xəbər verir ki, bu sözləri Moderator az.- a açıqlamasında Təhsil Nazirliyi yanında İctimai Şuranın sədr müavini Nadir İsrafilov deyib.
Onun sözlərinə görə Reqlamentə əsasən məqsədimiz vətəndaşların dövlətin idarə olunmasında iştiraka cəlb edilməsi; mərkəzi və yerli icra hakimiyyəti və yerli özünüidarəetmə orqanlarının fəaliyyətinə ictimai nəzarətin həyata keçirilməsi; mərkəzi və yerli icra hakimiyyəti və yerli özünüidarəetmə orqanları ilə ictimaiyyət arasında səmərəli qarşılıqlı fəaliyyətin təşkili; mərkəzi və yerli icra hakimiyyəti və yerli özünüidarəetmə orqanlarının fəaliyyətində aşkarlığın və şəffaflığın təmin olunması; dövlət siyasətinin formalaşması, həyata keçirilməsi və qərarların qəbulu zamanı ictimai rəyin və vətəndaşların qanuni maraqlarının nəzərə alınması; əsas insan və vətəndaş hüquqlarının müdafiəsidir.
Üzərimizə düşən vəzifələri ictimai iştirakçılığın ictimai şura; ictimai müzakirə; ictimai dinləmə; ictimai rəyin öyrənilməsi; hüquqi aktların layihələrinin ictimai müzakirəsi; yazılı məsləhətləşmə formalarından istifadə etmək yolu ilə həyata keçirmək əzmindəyik. Dövlət və cəmiyyət həyatının ayrı-ayrı məsələlərinə dair əhalinin müxtəlif təbəqələrinin rəyinin öyrənilməsi məqsədi ilə sosioloji sorğuların və digər oxşar tədbirlərin keçirilməsi, hüquqi aktların layihələrinin onların hazırlanmasında iştirak edən şəxslərin, habelə vətəndaş cəmiyyəti institutlarının, ayrı-ayrı vətəndaşların, ekspertlərin və mütəxəssislərin iştirakı ilə araşdırılması, təhlil edilməsi və qiymətləndirilməsini planlaşdırırıq. Qanun həmçinin ictimai iştirakçılığın digər formalarda həyata keçirilməsini də məhdudlaşdırmır.
Xatırladaq ki, İctimai Şuranın yaradılması Təhsil Nazirliyinin və onun strukturlarının fəaliyyətində aşkarlığın və şəffaflığın daha da artırılması, təhsil sahəsində ictimaiyyətlə qarşılıqlı fəaliyyətin gücləndirilməsini təmin etmək məqsədi daşıyır. Başqa sözlə, İctimai Şura təhsil sahəsində müxtəlif məsələlərin müzakirəsi üçün məsləhətləşmələr təşkil etmək, təhsil sahəsində dövlət siyasətinin həyata keçirilməsi ilə bağlı Təhsil Nazirliyinə təkliflər vermək və qanunvericiliklə müəyyən edilmiş digər hüquqlara malik olan məşvərətçi qurumdur.
