ADPU-də 2016-2017-ci tədris ilinin payız semestrinin imtahan sessiyası davam edir
İlk olaraq onu qeyd edək ki, Azərbaycan Respublikasının Təhsil naziri cənab Mikayıl Cabbarovun "İmtahan sessiyasının təşkili və keçirilməsi barədə” imzaladığı müvafiq əmrə uyğun olaraq digər ali təhsil müəssisələrində olduğu kimi, Azərbaycan Dövlət Pedaqoji Universitetində (ADPU) də 2016-2017-ci tədris ilinin payız semestrinin imtahan sessiyası davam edir. ADPU-da imtahan sessiyasının mövcud qaydalara uyğun təşkil edilməsi, tələbələrin biliyinin qiymətləndirilməsində şəffaflığın və obyektivliyin təmin olunması, daxil olan hər bir şikayətin qısa müddətdə çevik şəkildə araşdırılıb lazımi ölçü götürülməsi üçün bütün zəruri tədbirlər həyata keçirilir. Qeyd edək ki, imtahanlar hər gün vaxtında başlayır, imtahan prosesi yaxşı təşkil edilib. İmtahan prosesində nizam-imtizam, səliqə-sahman təmin edilib. İmtahan prosesinə heç bir kənar müdaxilə yoxdur, tələbələrə biliklərini nümayiş etdirmək üçün lazımi şərait yaradılıb.
İmtahan Qərargahının rəhbəri, dosent Nailə Hüseynovanın bizə verdiyi məlumata görə, yanvar ayının 11-dən bugünədək 45 nəfər tələbə qərargaha müraciət edib. Bu müraciətlərin 40-ı yazılı qaydada verilən imtahanlardan, 5-i isə test üsulu ilə verilən imtahanlardan olub. Müraciətlər çevik şəkildə və diqqətlə araşdırılıb. Yazılı qaydada verilən imtahanlarla bağlı edilən 40 müraciətin 17-si tələbələrin xeyrinə həll edilib, müraciət edən digər tələbələrin isə imtahan zamanı davranış qaydalarına əməl etmədiklərinə, üzərlərində mobil telefon və ya digər köməkçi vasitələr aşkar olunduğuna görə onlar imtahandan kənarlaşdırılaraq protokollaşdırılıb və imtahan cavabları ləğv edilib. Test üsulu ilə verilən imtahanlarla bağlı edilən 5 müraciətdən 3-ü tələbələrin xeyrinə həll edilib, 2 müraciət isə təmin edilməyib.
Apelyasiya Komissiyasının sədri, dosent İradə Qasımovanın və sədr müavini, tarix üzrə fəlsəfə doktoru Vurğun Məmmədovun verdikləri məlumata görə, yanvar ayının 11-dən bugünədək komissiyaya yazılı qaydada verilən imtahanlarla bağlı 172 müraciət daxil olub. Daxil olan müraciətlərdən 25-i tələbələrin xeyrinə həll edilib, 17-si təmin edilməyib. Müraciət edən 3 tələbə araşdırmada iştirak etməkdən imtina edib. Digər müraciətlər isə araşdırılır. Test üsulu ilə verilən imtahanlarla bağlı komissiyaya 30 müraciət daxil olub. Onlardan 9-u araşdırılıb, 1-i müsbət həll edilib, digər müraciətlər isə araşdırılır. Tələbələrin biliyinin qiymətləndirilməsi zamanı da şəffaflıq və obyektivlik təmin edilir. Eyni zamanda imtahan prosesini tələbələrin valideyinlərinin, ictimaiyyət nümayəndələrinin, qeyri-hökumət təşkilatlarının təmsilçilərinin, kütləvi informasiya vasitələri nümayəndələrinin izləmələri üçün lazımi şərait yaradılıb. ADPU-da fəaliyyət göstərən İctimai Şura da imtahan prosesinə nəzarət edir. İmtahanların çevik, şəffaf və obyektiv keçirilməsi ADPU-nun rektoru, professor Cəfər Cəfərovun diqqət mərkəzindədir.
aztehsil.com
