Şagirdlərin yerdəyişməsi nə vaxt başlanacaq?

Yeni tədris ilinin başlanması və siniflərin komplektləşdirilməsi ilə əlaqədar olaraq şagirdlərin elektron yerdəyişməsi (www.sy.edu.az) portalında və bu məqsədlə yaradılmış alternativ qeydiyyat mərkəzlərində yerdəyişmə ilə bağlı sorğu qəbulu sentyabrın 15-dən dayandırılıb. Bununla yanaşı, sentyabrın 15-dək qəbul edilmiş sorğuların icrası davam etdirilir.

Hazırda valideynləri ən çox maraqlandıran məqamlardan biri də növbəti yerdəyişmənin nə vaxt başlayacağı ilə bağlıdır.

Şagirdlərin yerdəyişməsinə oktyabrın 15-də başlanacaq. Təhsil Nazirliyinin 12 sentyabr məlumatına əsasən, elektron yerdəyişmə ilə bağlı ümumilikdə 46173 müraciət daxil olub. Onlardan 42196 şagirdin digər təhsil müəssisəsinə yerdəyişməsinə icazə verilib, 3430 sorğu hazırda icra edilir, 547 sorğuya isə dil və təmayül uyğunsuzluğu səbəbindən imtina verilib.

Şagirdlərin elektron yerdəyişməsi ilə bağlı vətəndaşlara kömək məqsədilə Bakı şəhəri və regionlarda alternativ qeydiyyat mərkəzləri fəaliyyət göstərir.

Şagird yerdəyişməsinin elektronlaşdırılması bu prosesdə məktəb və valideyn arasında olan məsafənin azaldılmasına və valideynin təhsil müəssisəsi ilə təmasının daha şəffaf şəkildə təşkilinə xidmət edir.

Qeyd edək ki, şagirdlərin yerdəyişməsi prosesi cari ilin avqustun 15-dən www.sy.edu.az portalı və Alternativ Qeydiyyat mərkəzləri vasitəsilə həyata keçirilir.