KOMPÜTER OYUNLARI VƏ UŞAQLAR

Kompüter oyunları nəinki balacaları, həmçinin gənc nəsli və ortayaşlı insanları, bəzən hətta yaşlı insanları da özünə cəlb edir.

Xüsusən müasir dövrdə futbol yarışlarından məntiqi oyunlara, avtomobil oyunlarından strategiya oyunlarına qədər necə oyun istəyirsinizsə, yüzlərlə növdə tapmaq olur. Həm də zaman keçdikcə oyunlarda ən son texnologiya və qrafika zənginliklərinin əlavə olunması bu oyunların cəlbediciliyi daha da artırır. Belə olduqda təbii ki, uşaqların kopüter oyunlarına marağı da artır. Bəs valideynlər uşaqlarına kompüterdə oyun oynamağa icazə verməlidirlərmi? Bunun üçün aşağıda qeyd edilmiş kompüter oyunlarının uşaqlara müsbət və mənfi təsirlərinə baxaq.

Kompüter oyunlarının uşaqlara müsbət təsiri:

1. Uşaqların hadisələrə cəld reaksiya vermə qabiliyyətini artırır.

2. Əşyaları virtual qavrayışı artır.

3. Yaddaşı gücləndirir.

4. Məntiqi təfəkkürün inkişafına birbaşa təsir edir.

5. Diqqətliliyi artırır.

6. Hadisələri və ya əşyaları kateqoriyalaşdırmaq, sistemləşdirmək vərdişlərini artırır.

Kompüter oyunlarının uşaqlara mənfi təsiri:

1. Uzun müddət kompüter qarşısında oturmaq uşaqların sağlamlığına, xüsusən də gözlərinə ziyandır.

2. Bir çox hallarda nəzarət edilmədikdə uşaqlar oyuna o qədər aludə olurlar ki, nəticədə o oyundan asılılıq əmələ gəlir. Belə halda bu, xəstəliyə bənzəyir.

3. Uşaqlar bəzən oyunlara o qədər vaxt sərf edir ki, dərslərini oxuya və digər sosial işlərlə məşğul ola bilmir.

Bu qeyd edilən mənfi təsirlərinin hamısı birbaşa olaraq uşağın normadan artıq kompüter qarşısında oturması ilə əlaqədardır. Əgər valideynlər buna nəzarət edərsə, bu halda uşaqların kompüter oyunları oynamaqları onlara xeyir verə bilər. Lakin araşdırmalar göstərib ki, uşaqların kompüter almazdan öncə dərslərində göstərdikləri nəticələr kompüter aldıqdan sonra göstərdiyi nəcitələrdən daha yaxşı olur. Bununla belə, hər bir uşaq fərqli xarakterə, iradəyə və ağıla sahib olduğu üçün kompüterin həmin uşağa necə təsir edəcəyi də onun özündən asılıdır.