"Axı, təhsil müəssisəsini yenicə bitirib, müstəqil həyata qədəm qoyan gəncdən hansı iş təcrübəsi tələb oluna bilər...?"

İstər ali təhsil olsun, istərsə də orta ixtisas təhsilinə yiyələnmiş tələbələr məzun olduqdan sonra çətin bir vəziyyətlə üzləşirlər. Onlar işləmək üçün üz tutduqları yerdə təcrübə problemi ilə rastlaşırlar. Tanınmış təhsil eksperti Nadir İsrafilov vacib problemlə bağlı öz fikirlərini feysbuk hesabında paylaşıb.

"Ötən bazar günü "canımı dişimə tutub” bir hind filminə baxdım. Adı yadımda qaldığı qədər, deyəsən "Ləyaqət qanunu” idi. Nə isə... Kolleci yenicə bitirib, işə düzəlmək üçün müraciət edən bir gəncə şirkət rəhbəri deyir ki, sənin bu sahədə heç bir iş təcrübən yoxdur, mən səni işə necə götürə bilərəm. Gənc isə - iş təcrübəsi həyatda, iş prosesində qazanılır, mən ki, kolleci yenicə bitirmişəm, bu təcrübəni harda qazana bilərdim - cavabını verir. Öz-özümə fikirləşdim, ya bu tendensiyanı hindlilər bizdən əxz edib, ya da biz onlardan götürmüşük. Axı, təhsil müəssisəsini yenicə bitirib, müstəqil həyata qədəm qoyan gəncdən hansı iş təcrübəsi tələb oluna bilər...? Ya, bu təcrübənin qazanılması üçün oxuduqları müddətdə təhsil aldıqları müəssisələrdə onlara lazımi şərait yaradlmalı, ya da ki, əmək fəaliyyətinə başlamaq üçün imkan yaradılmalıdır ki, onlar bu təcrübəni iş prosesində qazansınlar. Əks təqdirdə "Bugünkü gənclərə geniş yol açmaq lazımdır” kimi məqsədimiz elə məqsəd olaraq da qalacaqdır".