“Elektron universitet” nəyə xidmət edir?
Təhsil Nazirliyi Azərbaycan Dövlət Pedaqoji Universiteti (ADPU) ilə birgə "Elektron universitet” layihəsini həyata keçirir.
Aztəhsil.com xəbər verir ki, ADPU-dan bildirilib ki, layihə çərçivəsində keçirilən tədbirdə rektor Cəfər Cəfərov yeni sistem üzrə görülən işlər barədə məlumat verib.
Bildirilib ki, "Elektron universitet” layihəsi tədris prosesinin çevik, şəffaf və obyektiv idarə edilməsinə şərait yaradır. Bu layihə vasitəsilə tələbələr tədris strukturlarını, avtomatlaşdırılmış alt sistemlərini özündə birləşdirən vahid informasiya mühitində istənilən fənn üzrə materialları əldə edəcək, müəllimlərin mühazirələri ilə tanış ola biləcəklər.
"Neuron Technologies” Məhdud Məsuliyyətli Cəmiyyətinin təsisçi və baş direktoru İsmayıl Ələkbərov qeyd edib ki, layihə çərçivəsində məlumatların idarə olunması sistemində təşkilati struktur yaradılıb. Müəllimlərin, tələbələrin şəxsi və akademik məlumatları sistemə daxil edilib, qruplar yaradılıb, beynəlxalq əlaqələr qurulub və s. işlər həyata keçirilib. Hazırda tədrisin idarə olunması sistemində fənn kataloqunun, tədris planlarının, fənn qruplarının yaradılması üzərində iş aparılır.
Sonra tədris işləri üzrə prorektor Eldar Aslanov, elmi işlər üzrə prorektor Asəf Zamanov, filologiya fakültəsinin dekanı, professor Buludxan Xəlilov, tarix və coğrafiya fakültəsinin dekanı Şahin Pənahov, fizika və texnologiya fakültəsinin dekanı Arzu Daşdəmirov və başqaları "Elektron universitet” layihəsinin uğurla həyata keçirilməsi və ADPU-nun İKT infrastrukturunun təkmilləşdirilməsi ilə bağlı fikir və mülahizələrini bölüşüblər.
