Bu ölkədə ali məktəblərdə yeni qəbul qaydaları tənqid olunub

Avstriyanın ali təhsil ocaqlarında nəzərdə tutulan yeni məhdudiyyətlər gözlənildiyi kimi, etirazlarla qarşılanıb.

Nazirlər Kabinetinin iclasında 2019-2021-ci illəri əhatə edən dövrdən etibarən magistr və bakalavr pillələri üzrə bir sıra ixtisaslara tələbə qəbulunda say məhdudiyyətinin (Numerus Clausus) tətbiq olunması barədə qərar qəbul edilib. Hüquqşünaslıq, pedaqoji və xarici dillər üzrə ixtisasları əhatə edən qaydalara görə, həmin ixtisaslara qəbul zamanı abituriyentlərin sayı müvafiq say həddindən artıq olduğu halda qəbul imtahanları keçirilməlidir. Bu məhdudiyyətlər artıq memarlıq (şəhərsalma), biologiya (biokimya), informatika, iqtisad elmləri, əczaçılıq və jurnalistika ixtisasları üzrə tətbiq olunur. Lakin yeni qaydaların özünəməxsusluğu ondan ibarətdir ki, hansısa bir ixtisasa tələbə qəbulunda məhdudiyyət ölkədəki bütün universitetlər üzrə deyil, müraciətlərin sayının müvafiq limiti keçən ayrı-ayrı ali təhsil ocaqlarında fərdi şəkildə tətbiq olunacaq.

Yeni qaydaları müdafiə edən elm naziri Haynts Fasmann bildirib ki, hazırda Avstriya universitetlərində hüquq fakültələrində orta hesabla hər fənn üzrə bir tədris müəllimi 70 tələbə, xarici dillərdə 73, pedaqoji fakültələrdə isə 123 tələbəyə dərs keçməlidir. Bu isə tədrisin keyfiyyətinə mənfi təsir göstərir. Gələcəkdə hər bir müəllim semestr ərzində bir fənn üzrə orta hesabla 40 tələbə ilə məşğul olmalıdır.

Hazırda Avstriyanın ali təhsil müəssisələrində 280 min tələbə təhsil alır. Yeni məhdudiyyətlər hesabına yaxın illərdə ali məktəblərdəki tələbələrin sayı 15 min nəfər azala bilər.

Universitet rektorları və professor-müəllim heyətləri tərəfindən alqışlanan yeni qaydalar Avstriya Sosial-Demokratlar Partiyası (SPÖ) və xüsusilə də Avstriya Tələbələr Assosiasiyası tərəfindən sərt tənqid olunub. Tələbələr Assosiasiyası yaydığı bəyanatda hökuməti yeni qaydaları tətbiq etməklə real problemləri qulaqardına vurmaqda ittiham edib. Qeyd edilib ki, sosial selektiv qəbul qaydaları gələcəkdə maddi cəhətdən aşağı təminatlı ailələrə ciddi zərbə olacaq və universitetlərin hamı üçün açıq ali təhsil müəssisələrindən məhdud sayda şəxslərin təhsil almaq hüququna sahib olduğu elitar mərkəzlərə çevirəcək. Bunun əvəzində isə ali təhsil müəssisələrində professor-müəllim heyətinin sıraları genişləndirilməli, keyfiyyətli tədris üçün universitetlərin büdcəsi artırılmalı və həmçinin müəllimlər üçün icbari didaktik təkmilləşmə kursları təqdim olunmalıdır.