Məktəb direktorları üçün seminarlara başlanıb
Bakı Şəhəri üzrə Təhsil İdarəsinin (BŞTİ) tabeliyindəki ümumtəhsil məktəblərinin direktorları üçün seminarlara başlanıb.
Aztəhsil.com xəbər verir ki, BŞTİ-dən bildirilib ki, məktəb direktorlarının təşəbbüsü ilə keçirilən ilk seminar 147 nömrəli texniki-humanitar liseydə təşkil edilib. Əsas məqsəd təhsil sahəsində tətbiq olunan yeniliklər barədə məktəb direktorlarını daha ətraflı məlumatlandırmaq, qarşılıqlı təcrübə mübadiləsini təşkil etmək, həmçinin tədrisin keyfiyyətinin artırılması üçün yeni üsul və metodlar tapmaqdan ibarətdir.
Seminarda məktəb idarəçiliyi, şagirdlərin nailiyyətlərinin yüksəldilməsi, direktorun bacarıqları, kargüzarlıq və digər məsələlərə dair məruzələr dinlənilib, müzakirələr aparılıb. İştirakçılar müzakirə edilən məsələlərlə bağlı təkliflər irəli sürüblər.
Seminarların ayrı-ayrı ümumtəhsil məktəbləri üzrə davamlı olaraq keçirilməsi nəzərdə tutulur.
