MEK-də “Beynəlxalq ərəb dili” gününə həsr həsr olunan tədbir keçirilib
MEK-də "Beynəlxalq ərəb dili” gününə həsr olunan tədbir keçirilib. AMEA Mərkəzi Elmi Kitabxanasının (MEK), Misir Ərəb Respublikasının Azərbaycandakı Səfirliyinin Mədəniyyət və Təhsil Əlaqələri Mərkəzinin və Azərbaycan Respublikasının Prezidenti yanında Bilik Fondunun təşkilatçılığı ilə MEK-də 18 dekabr - Beynəlxalq Ərəb Dili günü münasibətilə tədbir keçirilib.
Azərbaycanda səfərdə olan Misirin Süveyş Kanalı Universitetinin Ərəb dili ədəbiyyatı üzrə professoru Əbdül Rahim Əl-Kurdinin və Misir xəttatı Mustafa Məhəmməd Amrinin iştirakı ilə düzənlənən tədbirdə beynəlxalq aləmdə ərəb dilinə xüsusi rəğbət göstərilməsindən, bu dildə bədii nümunələrin, xəttatlıq sənətinin inkişafından söhbət açılıb.
Tədbiri giriş sözü ilə açan Mərkəzi Elmi Kitabxananın direktoru Leyla İmanova Misir Ərəb Respublikasının Azərbaycandakı Səfirliyinin Mədəniyyət və Təhsil Əlaqələri Mərkəzi ilə mütəmadi əməkdaşlıq edildiyini bildirib. Akademiyanın təsisçilərinin kitabxanada qoyulmiş büstlərinin altyazısındakı mətnlərin ərəbcəyə tərcüməsinin mərkəzin rəhbəri Əhməd Sami Elaydiyə məxsus olduğunu diqqətə çatdıran L.İmanova kitabxanada keçirilən tədbirlərə hər zaman dəstək göstərdiyinə görə ona təşəkkürünü bildirib.
Misir Ərəb Respublikasının Azərbaycandakı Səfirliyinin Mədəniyyət və Təhsil Əlaqələri Mərkəzinin direktoru Əhməd Sami Elaydi də öz nöbvəsində tez-tez MEK-də Misirlə bağlı tədbirlərin keçirilməsində əməyi olan hər kəsə minnətdarlıq ifadə edib. O,bildirib ki, ərəb dilinin Quran dili olması ona şöhrət gətirən ən başlıca amildir və zənginliyi, rəvan avazı ilə seçilən bu dil həm də poetik bir dildir.
Misirin Süveyş Kanalı Universitetinin Ərəb dili ədəbiyyatı üzrə professoru Əbdül Rahim Əl-Kurdi ərəb dilinin məziyyətlərindən danışıb və müsəlman ölkələri arasında vaxtilə iqtisadi-mədəni körpü yaradan bu dilin vahid İslam mədəniyyətinin təşəkkülündəki rolu haqqında məruzə edib.
Daha sonra Misir xəttatı Mustafa Məhəmməd Amrinin çıxışı olub, sənətkarın müəllifi olduğu 25 xəttatlıq nümunəsindən ibarət sərgi nümayiş etdirilib. Xəttat əsərləri barədə sərgi istirakçılarına geniş məlumat verib. Sonda Mustafa Məhəmməd Amri əsərlərindən birini Mərkəzi Elmi Kitabxanaya hədiyyə edib.
Qeyd olunub ki, hazırda istifadə olunan müasir Quran kitablarının mətni Mustafa Məhəmməd Amrinin əlyazması əsasında hazırlanıb.
