Eksternat imtahanlarına sənəd qəbulu başa çatıb
Eksternat imtahanlarına qeydiyyat və sənəd qəbulu başa çatıb. Dekabrın 1-dən başlayan qeydiyyat və sənəd qəbulu Bakı Şəhəri üzrə Təhsil İdarəsində (BŞTİ) aparılıb.
Aztəhsil.com xəbər verir ki, BŞTİ-dən bildirilib ki, ümumi orta təhsil səviyyəsi (IX sinif) üzrə eksternat imtahanlarında iştirak etmək üçün 99 ərizə qeydiyyata alınıb. Eksternat imtahanları dekabrın 26-27-də paytaxtdakı 258 nömrəli tam orta məktəbdə təşkil olunacaq.
Ərizələri BŞTİ tərəfindən qəbul edilmiş eksternlər dekabrın 21-22-də saat 10:00-dan 16:00-dək 258 nömrəli tam orta məktəbdən (şəxsiyyət vəsiqələrini təqdim etməklə) imtahana buraxılış vərəqələrini əldə edə bilərlər.
Eksternat imtahanlarında uğur qazanmış şəxslər ümumi orta təhsil haqqında sənəd (attestat) almaq üçün Dövlət İmtahan Mərkəzi tərəfindən ümumi orta təhsil səviyyəsi üzrə keçirilən buraxılış imtahanlarında iştirak etmək hüququna sahib olacaqlar.
Qeyd edək ki, sərbəst (eksternat) təhsilalma formasının tətbiqi müxtəlif səbəblərdən ümumi orta təhsil səviyyəsini başa vura bilməyən şəxslərə həmin səviyyə üzrə buraxılış imtahanı verib müvafiq təhsil sənədi almaq üçün şərait yaratmaq məqsədi daşıyır.
