Bakı Slavyan Universitetinin rektoru II kurs tələbələri ilə görüşüb
Bakı Slavyan Universitetinin (BSU) rektoru, professor Nurlana Əliyevanın II kurs tələbələri ilə görüşü olub.
Akt zalında baş tutan görüşdə rektor bundan əvvəl I kurs tələbələri ilə görüşdüyünü bildirib.
O, bu görüşlərin universitet rəhbərliyi ilə tələbə gənclər arasında körpü yaradılmasında mühüm rol oynadığını qeyd edib. N. Əliyeva I kurs tələbələrindən fərqli olaraq, II kurs tələbələrinin universitet həyatına, təhsil müəssisənin daxilində qayda-qanunlara daha yaxşı bələd olduqlarını bildirib. N. Əliyeva bu gün BSU-da istedad və qabiliyyətləri ilə fərqlənən xeyli sayda gəncin olduğunu diqqətə çatdırıb. O, Azərbaycanın gələcəyinin, dövlətçiliyimizin bir çox uğurlarının gənclərdən asılı olduğunu vurğulayıb.
N. Əliyeva universitetdə tələbələrin inkişafı, uğurlu gələcəyi üçün hər cür şərait yaradıldığını deyib. O, BSU-nun dünyanın bir sıra aparıcı universitetləri ilə sıx əlaqəsinin olduğunu, beynəlxalq layihələr əsasında tələbə-müəllim mübadiləsinin həyata keçirildiyini qeyd edib: "Təkcə Rusiyanın 27 universiteti ilə sıx əlaqələrimiz var. Bundan əlavə, Türkiyə, Bolqarıstan, Polşa, Çexiya, Ukrayna, Belarus və s. dövlətlərinin ali təhsil müəssisələri ilə yaxın münasibətlərimiz mövcuddur”.
O, universitetdə keçirilən tədbirlərdə dünyanın tanınmış alimlərinin, siyasi xadimlərinin iştirak etdiyini, tələbələrimizə tövsiyələr verdiklərini xatırladıb. N. Əliyeva ötən il BSU-da keçirilən beynəlxalq konfransda akademik Verbitskayanın, bu günlərdə təşkil olunan dəyirmi masada isə 8 ölkənin diplomatik nümayəndəliyinin rəhbərlərinin iştirak etdiyini söyləyib.
Rektor universitetdə keçirilən bütün tədbirlərin başlıca məqsədinin tələbələrin intellektual və mənəvi baxımdan inkişafını hədəflədiyini nəzərə çatdırıb: "70 nəfərdən artıq tələbənin yeməkxanadan pulsuz istifadəsinə şərait yaratmışıq. Yatmağa yeri olmayan tələbələrimiz üçün yataqxananın bərbad vəziyyətdə olan otaqlarını təmir etmişik”.
Rektor onu da vurğulayıb ki, indiki dövrdə gənclərimizin lazımi səviyyədə təhsil alması, mənəvi və intellektual baxımdan inkişafı üçün hər cür şərait var: "Bizim dövrümüzdə hər şey Moskvada müəyyən olunurdu. Heç kəs Kremlin iradəsindən çıxa bilməzdi. Ümummilli lider Heydər Əliyevin müəyyən etdiyi gənclər siyasəti siz tələbələrin hərtərəfli şəxsiyyət kimi formalaşması üçün işıqlı yollar müəyyən edib. Siz bu gün hüquqi, demokratik və sosial ədalətə söykənən bir cəmiyyətdə yaşayırsınız. 250 illik dövlətçilik təcrübəsi olan ölkələrdə belə bu cür demokratiya yoxdur. Azərbaycan Respublikasının Prezidenti İlham Əliyev Heydər Əliyev kursunu davam və inkişaf etdirərək ölkəmizin bütün parametrlər üzrə Qafqazın ən inkişaf etmiş ölkəsinə çevrilməsini təmin edib”.
Rektor işğal olunmuş Azərbaycan torpaqlarının güclü ordumuzun sayəsində qısa müddət ərzində işğaldan azad edilə biləcəyini dilə gətirib. "Amma biz qan tökülməsini istəmirik, torpaqlarımızı sülh danışıqları yolu ilə azad edəcəyimizə qəti əminik”.
