Məktəb psixoloqlarının praktik bilikləri artırılır

Təhsil Nazirliyi təhsildə inkişaf və innovasiyalar üzrə 1-ci qrant müsabiqəsində qalib olan layihələrdən biri də "Məktəb psixoloqlarının praktik biliklərinin artırılması və tətbiqi istiqamətində maarifləndirmə işinin təşkili” layihəsidir. Layihə rəhbəri 38 saylı orta məktəbin psixoloqu Jalə Məmmədovadır. 

L.Məmmədova bildirib ki, layihənin əsas məqsədi region orta məktəb psixoloqlarının praktiki bacarıqlarının inkişaf etdirilməsinə dəstək olmaqdır. 

Layihə çərçivəsində 3 regionda seminarlar keçirilib. İlk olaraq Mingəçevir şəhərində təlim-seminar keçirilib. Seminara Yevlax və Agdamdan da psixoloqlar qatılıblar. 

İkinci görüş Ucar rayon psixoloqları ilə keçirilib. Seminarlarin ilk iki günü psixoloqlara müxtəlif yaş dövrlərində uşaqlarda rast gəlinən davranış pozuntuları, nitq qüsurları və inkişaf ləngimələri haqda məlumatlar verilib. Məktəb şəraitində belə şagirdlərlə necə işləmək lazım olduğu ilə bağlı diskusiyalar aparılıb. Bundan başqa mövzu ilə bağlı film nümayiş olunub, qrup çalışması həyata keçirilib və yeni fikirlər müzakirə olunub. 

Seminarın 3-cü günü isə Mingəçevir şəhər 8 saylı tam orta məktəbdə  və Ucar şəhər 3 saylı tam orta məktəbdə valideynlər və şagirdlərin iştirakı ilə praktiki hissə təşkil olunub. Bu görüşlərdə valideynlərin narahatlıqları dinlənilib və onlara proqramlı şəkildə ev şəraitində uşaqla necə işləməklə bağlı müəyyən istiqamətlər verilib. Sonda bütün iştirakçı psixoloqlara sertifikatlar təqdim olunub.

Qeyd edək ki, Təhsildə inkişaf və innovasiyalar üzrə 1-ci qrant müsabiqəsi Azərbaycan Respublikası Təhsil Nazirliyi tərəfindən dövlət ümumi təhsil müəssisələri və bu müəssisələrdə çalışan pedaqoji işçilər üçün elan edilib.