Azərbaycan dilçiliyində frazeologiya nəzəriyyəsi ilk dəfə sistemli təhlil olunub
Azərbaycan Milli Elmlər Akademiyasının Nəsimi adına Dilçilik İnstitutunun tətbiqi dilçilik şöbəsinin böyük elmi işçisi, filologiya üzrə fəlsəfə doktoru Fidan Salayevanın "XX əsrin II yarısında Azərbaycan dilçiliyində frazeologiya nəzəriyyəsinin inkişafı” monoqrafiyası çapdan çıxıb.
Aztəhsil.com xəbər verir ki, institutdan AZƏRTAC-a bildirilib ki, monoqrafiyada ilk dəfə XX əsrin II yarısında Azərbaycan dilçiliyində frazeologiya nəzəriyyəsinin inkişafı və ona dair konsepsiyalar sistemli təhlil olunub. Əsərdə frazeologiyanın dilçilikdə yeri və mövqeyi, frazeoqrafik sistemin bəzi prinsipləri, onun hüdudlarının müəyyənləşdirilməsi məsələlərinə aydınlıq gətirilib.
Monoqrafiyadan Azərbaycan dilinin, eləcə də başqa xalqların dillərinin tarixi frazeologiyasının və leksikoqrafiyasının araşdırılmasında, frazeoloji lüğətlərin tərtibində istifadə oluna bilər.
Kitabın redaktoru professor İsmayıl Məmmədli, rəyçiləri professor Nəriman Seyidəliyev və filologiya üzrə elmlər doktoru Tünzalə Baxşıyevadır.
