Bakı Dövlət Universitetində görkəmli alim Qoşqar Əhmədovun 100 illik yubileyi qeyd olunub
Noyabrın 2-də Bakı Dövlət Universitetində (BDU) görkəmli alim və pedaqoq, fizika-riyaziyyat elmləri doktoru, professor, Azərbaycan Milli Elmlər Akademiyasının müxbir üzvü Qoşqar Əhmədovun anadan olmasının 100 illik yubileyinə edilən elmi konfrans keçirilib.
Aztəhsil.com azərtac.az-a istinadən xəbər verir ki, tədbirdə BDU-nun rektoru, akademik Abel Məhərrəmov professor Q.Əhmədovun mənalı ömür yolundan, səmərəli elmi-pedaqoji fəaliyyətindən danışıb.
Bildirilib ki, Qoşqar Əhmədov 1941-ci ildə Azərbaycan Dövlət Universitetinin (indiki BDU) fizika-riyaziyyat fakültəsini bitirib. 1941-1945-ci illərdə Böyük Vətən müharibəsində iştirak edib. Hərbi Akademiyada təhsil alıb.
Q.Əhmədov 1946-cı ildə ordu sıralarından tərxis olunduqdan sonra universitetdə çalışıb və aspiranturada oxuyub. O, 1950-ci ildə namizədlik, 1960-cı ildə doktorluq dissertasiyasını müdafiə edib. 1969-cu ildə Azərbaycan Elmlər Akademiyasının müxbir üzvü seçilib.
Alim universitetin fizika-riyaziyyat fakültəsinin dekan müavini və dekanı, differensial və inteqral tənliklər kafedrasının müdiri vəzifələrində işləyib. Qeyd edilib ki, 70-dən çox elmi əsərin müəllifi olan Q.Əhmədov yüksək ixtisaslı mütəxəssislərin hazırlanmasında mühüm xidmətlər göstərib.
Digər çıxış edənlər də Q.Əhmədovun elmə, təhsilə əvəzsiz töhfələr verdiyini diqqətə çatdırıblar. Sonra konfrans işini bölmə iclaslarında davam etdirib.
