Xəbərlər
09 may 2016
15 079
“Bilikli müəllimlər daha yüksək əməkhaqqı əldə etməlidir”
"Daha yüksək nəticə göstərən və daha yüksək biliklərə malik olan müəllimlər daha yüksək əməkhaqqı əldə etməlidir”.
Bunu təhsil naziri Mikayıl Cabbarov deyib.
Təhsil Strategiyasına uyğun olaraq, müəllimlərin əmək haqqı islahatının ikinci mərhələsinə - differensal, yəni peşəkarlıq səviyyədən və əməyin nəticələrindən asılı olan əmək haqqı sisteminə keçidin planlaşdırıldığını deyən Təhsil Naziri diqqətə çatdırıb ki, bununla bağlı konsepsiya hələ hazırlanır: "Daha yüksək nəticə göstərən və daha yüksək biliklərə malik olan müəllimlər daha yüksək əməkhaqqı əldə etməlidir. Lakin bunun həyata keçirilmə meyarlarının tətbiqi istiqamətində işlər həyata keçirilir. Ekspertlərin təklifi və aidiyyatı dövlət orqanlarının birgə iştirakı ilə bu meyarlar dəqiqləşdiriləcək”.
Regional maliyyələşmə idarələrinin yaradılmasında əsas məqsədin təhsillə bağlı bütün maddi təchizatın optimallaşdırılmış formada həyata keçirilməsini təmin etmək olduğunu vurğulayan M.Cabbarovun sözlərinə görə, hazırda regional maliyyələşmə idarələri prezidentin müvafiq sərəncamına əsasən 2016-cı ilin dövlət büdcəsi haqqında qanunun tətbiqinə dair onların üzərinə qoyulan vəzifələri həyata keçirir: "Bu idarələr həm yerli icra hakimiyyəti orqanları, həm də Maliyyə Nazirliyinin tabeliyində olan yerli maliyyə idarələri ilə sıx əməkdaşlıq edir. Bütün bu işlərin görülməsində əsas məqsəd ümumtəhsil sisteminin maddi təminatı, təchizatı, cari təmiri mümkün qədər optimallaşdırılmış formada həyata keçirilməsindən ibarətdir. Burada həm təhsil alanların, həm məktəblərin tədris prosesi üçün zəruri olan təminatı ən yüksək səviyyədə həyata keçirilsin”.
Lent.az\\
