Qış mövsümü oktyabrın 1-dən başlansa, təhsil müəssisələrində...
Bildiyiniz kimi Nazirlər kabinetinin müvafiq qərarına əsasən, Azərbaycanda qış mövsümü hər il noyabr ayının 15-də başlayır, aprelin 15-də bitir.
Bu qərara əsasən də bütün müəssisələrdə, o cümlədən də, təhsil müəssisələrində istilik sistemilə bağlı bütün məsələlər noyabr ayının 15-dən işə salınır.
Təhsil müəssisələrində vahid ştat cədvəli haqqında qaydalara əsasən, fərdi qazanxanası olan məktəblərdə, noyabrın 15-dən aprelin 15-nə qədər üç ştat ocaqçı vəzifəsi olur. Aprelin 16-dan başlayaraq noyabrın 14-nə qədər olan müddətdə isə həmin qazanxana invertarlarının qorunması üçün isə 0,5 ştat ocaqçı vəzifəsi saxlanılır.
Soba ilə (odunla) qızınan məktəblərdə isə 15 noyabr-15 aprel qış mövsümündə hər 5 otağa 0,5 stavka ocaqçı ştatı düşür.
16 aprel-14 noyabrda yay mövsümunda isə 0,5 stavka ocaqçı ştatı saxlanılır. ( sobalara nəzarət etmək üçün )
Hər il Azərbaycanın yerləşdiyi iqlim vəziyyəti ona uyğundur ki, artıq burada oktyabrın ilk günlərindən başlayaraq, havaların kəskin soyuması müşahidə olunur.
Ümumtəhsil məktəblərində havanın soyuması ilə əlaqədar olaraq, təhsil alanların davamiyyətinin kəskin şəkildə aşağı düşməsi, bir sıra yoluxucu xəstəliklərin yaranması üçün şərait yaradır.
Nəzərə alsaq ki, Azərbaycanda hal-hazırda bir milyon yarımdan çox təhsil alan var və təqribən 150 000-dən artıq müəllim və texniki heyət var, ümumillikdə, bir milyon yarımdan çox insanın bu iqlim şəraitinə uyğun olaraq, təhsil almasına və təhsil prossesini düzgün təşkil olunması üçün qış vaxtının ümumtəhsil məktəblərində oktyabrın 1-nə keçirilməsi artıq arzu olunandır.
Hal-hazırda, məktəblərimizin əksəriyyətində istilik sisteminin bərbad vəziyyətdə olması hətta bir çox məktəblərin il boyu istiliklə bağlı problemləri nəzərə alsaq heç olmasa fərdi qazanxanası olan məktəblərin istilik sisteminin oktyabrin 1-dən işə salınması yaranmış problemin həllində müsbət addım olardı.
Digər tərəfdən mart ayının 16-dan yaz tətili başlayır. Həmin vaxtdan başlayaraq havalar hər gün istiləşməyə başlayır. Düşünürəm ki, qış vaxtının bitməsinin 16 mart tarixinə salınması daha doğru olardı.
Qış mövsümünün 1 oktyabrdan başlanması məktəblərimizdə yoluxucu xəstəliklərin, davamiyyətin aşağı düşməsinin qarşısını alar, ən əsası isə tədris prosesinin təşkilində yaranmış maneələri aradan qaldırar.
Elşən Qafarov
