Xəbərlər / Cəmiyyət
05 oktyabr 2017
3 660
Bakıda Uşaq Yaradıcılıq Mərkəzləri bağlanır! - "İndi uşaqlar avaraçılıq edəcək? " - ŞİKAYƏT
Övladını 3 ildir Səbail rayonunda yerləşən yaradıcılıq mərkəzinin rəms dərslərinə aparan valideyn Aynur Məhərrəmova mərkəzin bağlanmasından şikayətçidir.
Valideyn bildirir ki, adıçəkilən məkanda yerləşən mərkəzə uşaqların axını da çoxdur. Orda rus dili, ingilis dili, riyaziyyat, rəsm – hər sahədə dərslər keçirilir:
"Mərkəz bağlansa, bura gələn uşaqlar hara gedəcək, necə edəcək? Mərkəzin daha uzağa – Qaradağ və ya Əhmədliyə köçürülmə ehtimalı var. Oğlumu hər gün Səbaildən Əhmədliyə aparıb-gətirməyə gücüm yoxdur. Özü də 3 ildir ki, həvəslə rəsmə gəlir. İndi yaradıcılıq mərkəzi bağlansa, uşaqlar avaraçılıq edəcək?” – deyə Aynur Məhərrəmova bildirib.
Valideynin dediklərinə görə uşaq axının olduğu halda buranın bağlanmasının səbəbi nədir? Deyilənə görə Bakıda olan yaradıcılıq mərkəzlərinin bir neçəsi birləşdiriləcək. Ləğv olunan təhsil ocaqlarının müəllimləri isə işsiz qalacaq. Hətta mərkəzin direktoru da narahatdır və müəllimlərin işsiz, uşaqların gəldiyi dərslərdən geri qalmamaları üçün Təhsil Nazirliyinə şikayət etməyi məsləhət görüb.
20 saylı Uşaq Yaradıcılıq Mərkəzinin direktoru İlhamə Turabova ilə əlaqə saxladıq. İlhamə xanım mərkəzin bağlanacağını təsdiqləsə də, bunun səbələrini izah edə bilmədi. Təhsil Nazirliyi və ya əlaqədar qurumlarla əlaqə saxlamağımızı dedi.
Bakı Şəhər Təhsil İdarəsinin ictimaiyyətlə əlaqələr sektorunun müdiri Bəşarət Məmmədova zəng etdik. Sualımızı səsləndirəndən sonra bildirdi ki, zəhmət olmasa yazılı şəkildə bizim elektron ünvana yazın. Yazdıq, üstəlik xahiş də etdik ki, tez bir zamanda cavablandırılsın. Çünki valideynlər narahat, müəllimlər isə narazıdır. Amma adıçəkilən ünvandan cavab gəlmədi. Növbəti gün zəng etdik, cavab vermədilər. Və nəhayət, bu gün tezdən əlaqə saxlayıb cavabı gözlədiyimizi dedik. Bəşarət Məmmədov bildirdi ki, sualı cavablandıran mən deyiləm. Əlaqədar şəxslər cavablandırsın ki, mən də sizi məlumatlandırım. Hələ də Təhsil İdarəsindən cavab gəlmədiyi üçün yazını qarşı tərəfin açıqlaması olmadan işıqlandırmaq məcburiyyətində qaldıq.
"Heç vaxt heç nə gec deyil” deyərək, açıqlamanızın yolunu hələ də gözləyirik…
A24.az
