Bakının orta məktəblərində bit yayıldı - Valideynlər həyəcanda

Dərs ilinin açılması özülə bərabər problemlər də gətirdi. Bu dəfə bit problemindən yazacayıq.

Yay tətilini şəhərdən kənarda və regionlarda keçirənlərin hamısı şəhərə qayıdıblar. Üstəlik də özlərilə bərabər kiçik bir problem gətiriblər.

Könül Məmmədzadə (ad şərtidir) adlı valideyn övladını məktəbə göndərib və uşaq məktəbdən qayıtdıqdan sonra saçında sirkə tapıb. Valideyn deyir ki, məsələ ilə bağlı digər valideynlərə də xəbər verib. Məlum olub ki, bit təkcə bir məktəbdə deyil, şəhərin müxtəlif yerlərində yayılıb. Uşaq bağçalarında da bu problem var.

Qeyd edək ki, bir neçə gün bundan əvvəl deputat Araz Əlizadə Milli Məclisin Əmək və Sosial Siyasət Komitəsinin iclasında ölkədə bit təhlükəsinin olduğunu gündəmə gətirmişdir.

Millət vəkili bu şikayətləri araşdırdığını qeyd etmişdir. "Respublika Gigiyena və Epidemiologiya Mərkəzinə zəng etdim, bildirdilər ki, əvvəllər onlar müqavilələr əsasında zirzəmiləri, zibil yeşiklərini dərmanlayıblar. Amma indi müqavilə yoxdur. Səhiyyə Nazirliyindən də dedilər ki, onlarla kimsə müqavilə bağlamayıb. Mənzil Kommunal İdarəsinə də getdim. Oradan da dedilər ki, İcra Hakimiyyəti bunun üçün pul ayırmayıb. Həmin İcra Hakimiyyətinin adını çəkmək istəmirəm, amma ora da getdim. Dedilər ki, bunun üçün İcra Hakimiyyəti başçısının adına ərizə yazmalıyam, qəbula düşməliyəm. Adamı yorurlar, bu, biabırçılıqdır”.

Məsələ ilə bağlı Respublika Gigiyena və Epidemiologiya Mərkəzi ilə əlaqə saxladıq. Səhiyyə Nazirliyinin Respublika Gigiyena və Epidemiologiya Mərkəzinin şöbə müdiri Ziyəddin Kazımov açıqlamasında bildirdi ki, hansı nömrəli bağça və ya məktəbdirsə, hansı uşaqda tapılıbsa bizə məlumat verilməlidir. Biz bundan sonra araşdırma apara bilərik. Biz müqavilə əsasında dezinfeksiya işləri aparırıq. Mərkəzə bitin yayılması ilə bağlı konkret müraciət daxil olmayıb. Rayonlarda fəaliyyət göstərən şöbələrimizə konkret olaraq bitin yayıldığı müəssisə, sinif haqqında məlumat verilməlidir, biz bundan sonra yoxlamalar aparırırıq”.