VMA rəhbəri 187 saylı məktəblə bağlı jurnalistlərə müraciət etdi

 

187 saylı məktəblə bağlı. Hər zaman istəyirik ki, mediamız inkişaf etsin, mediaya bir ara "pul qazanmaq" həvəsi ilə "təşrif" buyuran elementlər təmizlənsin. Bunun üçün dövlət müəyyən addımlar atdı. Mətbuat Şurası, jurnalistlərə ev, bəzi illərdə borclardan qurtulma və s. Amma hələ də, jurnalist peşəkarlığı, mədəniyyəti, niyyət şəffaflığı, medianın ictimai əhəmiyyətinin çəkisi problem olaraq qalır. Baxın, jurnalist səsyazma apararaq guya şikayətin daxil olduğunu bildirir. Ona hansı şikayətin, hansı fakt üzrə olması barədə sual verilir. O isə ümumi sözlərlə "ordan burdan cəm edərək" konkret fakt qoymadan çalışır ki, oxu atıb kaman gizlətsin və qarşı tərəfin hövsələsizliyinə nail olub bir, iki acı söz qopartsın. Və bəyan etsin ki, baxın, görün, filankəs necə guya "təhqir" etdi. Hörmətli jurnalist. 1. İlk öncə hansı məkana müraciət etdiyinizə baxın. Məktəb- məbəddir. 2. Daha sonra o məbədə necə daxil olması barədə müvafiq qayda və təlimatlara əməl edin. (Bakı şəhəri üzrə Təhsil İdarəsinin jurnalistlərin məktəblə münasibəti ilə bağlı müvafiq təlimatları). 3. Vətəndaşın səsyazısının dinlənilməsi barədə kimin hansı şəkildə səlahiyyətli olub olmaması və bundan razılıq alınması barədə qanunvericiliyi nəzərə alın, səsin yazıldığını bildirib icazə alın. 4. Suallarınızı keyfiyyətli seçin, bunun üçün də konkret faktlara və sənədlərə sahib olun. Heç bir halda çıxışı təhrif etməyin. Təhqirin nə olduğunu heç olmasa lüğət ilə ayırd edə bilin. 5. Məqsədiniz, niyyətiniz vəziyyətin yaxşılaşmasına doğru dəyişməyə nail olmaq, bununla da, təhsil məbədinə kömək etmək olsun. Məktəb haqqında, pedaqoq haqqında mənfi rəy yaratmaq və bunu tirajlamaq yox. 6. Hədəf seçdiyiniz obyekt və şəxs haqqında biraz doğurdan da, dəqiq araşdırma, əziyyət çəkib onun hansı mədəniyyət sahibinə, hansı təcrübəyə və nailiyyətlərə malik olduğunu sözün əsl mənasında öyrənin. 7. Rəsmi, yazılı müraciət qaydalarına yiyələnin. 8. Söhbət etdiyiniz şəxsi özünüzlə, yaradıcılığınız və təcrübənizlə sırf özünüz üçün müqayisə edin. Kiminlə danışdığınıza varın. 9. Əldə etdiyiniz nəticələri hədəf seçdiyiniz şəxsə göndərin. Ölçü götürülməsini xahiş edin. Nəticə olmadıqda ictimailəşdirin. Amma bunu elə edin ki, vəziyyəti dəyişməyə yönəlik pozitiv nəticəyə xidmət etsin. 10. Heç bir halda nəticələrinizi elə təqdim etməyin ki, təhsil məbədi, uzun illərin pedaqoqu haqqında cəmiyyətdə ani yanlış fikir formalaşsın. Yalnız bu hallarda siz əsl jurnalist kimi həm problemi işıqlandırar, həm də, cəmiyyətə fayda verə bilərsiz. Düzdür çətindir, amma bu peşənin incəliklərinə hörmət edən adam üçün şərəfdir. Qaldı səsyazısından "bomba effekti axtaran böyük təhqir" başlığı vermək və tirajlamaq artıq niyyətin mahiyyətini ağıllı adam üçün açır. Maştağa kəndi ağır ağsaqqalları olan sayılan kəndlərimizdəndir. Məktəbin müdiri Nailə xanıma da, heç vəzifə qalsın bir kənara, məhz milli ənənələrə sadiq ana, qadın kimi kənddə böyük hörmətə malikdir. Onu yaxından tanıyan insan isə hansı mədəniyyət, həssasiyyat və xeyirxahlıq sahibi olmasını bilir. Bəlkə də, o yazan xanım da, yaxından tanısa idi, peşman olub özü üzr istəyərdi ondan. Bizlərdə adətdir, biri söz atır, o birilər "şərh qəhrəmanları" na çevrilirlər. Sanki hamı bir nəfər kimi "qurbanlıq" axtarır, öz problemlərindən yığılıb qalan kin-nifrətini kiməsə "yükləmək" istəyir. Yəni beləmi acizləşmişik. Direktor kəlməsinə əhalidə o qədər aqressiya var ki, nahaqqın oduna haqq da, yanır. Bəlkə məhz bilik məbədinə, əsl pedaqoqlarımıza hücumları dayandıraq? Bəlkə nəhayət, bir məktəb götürüb onun nailiyyətlərindən də, əziyyətlərindən də, yaxşı müəllimlərindən, şagirdlərindən də yazaq? Sərf etmir? Düşünək. Bəlkə müəllimlərin nüfuzunun bərpasına kömək edək, düşməsinə yox? Mətbuatımız hələ görünür, çox ələk- vələkdən keçməlidir. Axı bizdə layiqli jurnalistlər də var. Nə deyirsiz? Güman edirəm bu tipli insidentlərin "törədənlərin niyyəti" bəlli olsa da, hər ziyanlı işdə bir xeyir gizlənib. Bunun da, bir xeyri o olsun ki, nəhayət ki, ictimaiyyətin, medianın diqqəti də, elə bu məktəbin timsalında digər məktəblərin də nailiyyətlərinə cəlb olunar.