Xəbərlər / Cəmiyyət
28 avqust 2017
4 197
“Ləhcə və dialektlə danışan müəllimlərin auditoriyaya girməsi arzuedilən deyil”
Qulu Məhərrəmli: "Bununla bağlı xüsusi bir qanun qəbul etməyə ehtiyac yoxdur, amma...”
İranın Təhsil Nazirliyi fars dilində təmiz danmışa bilməyən, ləhcə ilə danışan müəllimlərin auditoriyaya girməsini yasaqlayan qərar qəbul edib. Bəs Azərbaycanda necə, ana dilində təmiz danışa bilməyən müəllimlərin auditoriyaya buraxılması yasaqlana bilərmi? Ana dilinin təmizliyi, yeniyetmə nəslə bu dilin qüsursuz çatdırılması üçün belə bir qadağanın gündəmə gətirilməsi mümkündürmü?
Açıqlama verən görkəmli professor Qulu Məhərrəmli məsələ ilə bağlı maraqlı fikirlər səsləndirib:
"Bu, incə və həssas məsələdir. Ola bilsin ki, Azərbaycanda təxminən 10 ildən sonra belə bir qanun qəbul edilsin.
Ukrayna Təhsil Nazirliyində xüsusi komissiya var. Hansı ki, bu komissiya müəllimlərin Ukrayna dilində təmiz danışması ilə bağlı attestasiyalar keçirir. Yalnız bu artestasiyadan keçən müəllimlər auditoriyaya buraxılır. Biz isə hələ ki, keçid dövründə yaşayırıq. Rus dilinin təsiri dilimizdə hələ qalır. Yeni təsir kimi ingilis və türk dillərinin Azərbaycan dilinə təsiri mövcuddur. Amma bunlar da əsas vermir ki, auditoriyada mühazirə oxuyan və ya orta məktəbdə dərs deyən müəllim ləhcə ilə, dilalektlə danışsın, ana dilin normalarına əməl eləməsin.
Hesab edirəm ki, bununla bağlı xüsusi bir qanun qəbul etməyə ehtiyac yoxdur. Son vaxtlar dilçiliyin inkişafı ilə bağlı kifayət qədər ciddi sənədlər qəbul olunub. Dövlət dili haqqında, qloballaşma şəraitində Azərbaycan dilinin işlənməsi, Azərbaycan dili və Azərbaycan əlifbası haqqında, kargüzarlıq haqqında qanunlarımız var. Problemlər bu qanunlara əməl edilməsi ilə bağlıdır.
Orta və ali məktəblərdə Azərbaycan dilini bilməyən, dialektlə, ləhcə ilə danışan müəllimlərin auditoriyaya girməsi arzuedilən deyil. Bu məsələni diqqətdə saxlamaq lazımdır. Təhsil müəssisəsinin rəhbərliyi bu məsələyə ciddi diqqət yetirməlidir. İranda qəbul edilən bu qanun bizim üçün də düşünməyə əsas verir”.
Moderator.az
