Xəbərlər / Müəllim
01 avqust 2017
6 909
Cəlilabad rayonunda müəllimlər üsyana qalxdı - İşləyən müəllimin yerini vakant etdilər
Cəlilabad rayonunda müəllimlər üsyana qalxıb.
Yeni tədris ilinə az qalmış dərs bölgüsü üstündə müəllimlərin narazılıqları başlayıb. Narazılığın əsas səbəbi isə müəllimlərin dərs yüklərinin qeyri-qanuni olaraq vakanta verilməsidir. Narazı müəllimlər direktor və Cəlilabad Rayon Təhsil Şöbəsinin müdiri ilə görüşüb və nəyə görə onların dərslərinin vakanta verildiyini soruşublar. Direktor və RTŞ müdirinin deməyinə görə onların bu işdən xəbəri yoxdur və bunu edən nazirlik olub.
Aksiyada iştirak edənlərdən birinin verdiyi məlumata görə, Təhsil Nazirliyi ilə əlaqə qurmaq heç bir nəticə verməyib. "Diaqnostik Qiymətləndirmədən sonra düşünürdük ki, 65 yaşına çatmış müəllimlər də təqaüdə çıxandan sonra dərs saatlarımız artar və normal əmək haqqı alarıq. Hər şeyin bahalaşdığı bir dövrdə aldığımız əmək haqqı ilə onsuz da dolanmaq olmur. Təhsili bazara döndəriblər. Kim istəyir pulunu verib direktor olur, nə istəyirlər edirlər. Sosial durumu ağır olan müəllimlərin dərs saatlarının yetərli olmadığı halda dərsləri vakanta verilməsi həm dövlətə, həm də bizə qarşı təxribatdır. Təhsil Nazirliyinin hansı qanunlarla işlədiyi bilinmir. Əgər bir müəllimin dərsi 36 saatı ötməyibsə, necə vakant verilə bilər. Bu nə qanunsuzluqdur?”
Qeyd edək ki, dünən müəllimlər Cəlilabad RTŞ qarşısında etiraz aksiyası keçiriblər. Aksiya iştirakçıları bildiriblər ki, əgər bu qanunsuzluqlara son qoyulmasa Prezident Aparatının qarşısına gedərək orada aksiya keçirəcəklər.
Mənbə:A24
