“Qadın ali, kişi isə orta təhsillidirsə, o ailənin ömrü uzun olmayacaq” — Psixoloq
2025-ci ilin yanvar-sentyabr aylarında ölkədə 36 332 nikah və 15 480 boşanma halı qeydə alınıb.
Ötən ilin müvafiq dövrü ilə müqayisədə əhalinin hər 1 000 nəfərinə nikahların sayı azalaraq 4.8-dən 4.7-yə, boşanmaların sayı isə 2.1-dən 2-yə düşüb.
Statistikaya görə, ən yüksək nikah səviyyəsi Şərqi Zəngəzur (5.8), Qarabağ (5.7) və Dağlıq Şirvan ilə Lənkəran-Astara (5.2) iqtisadi rayonlarında müşahidə olunub, boşanma hallarının yüksək olduğu rayonlar isə Bakı şəhəri (2.7) və Şərqi Zəngəzur (2.3) iqtisadi rayonlarıdır.
AzTehsil.com xəbər verir ki , məsələyə münasibət bildirən psixoloq Gülnar Orucova açıqlamasında bildirib ki, boşanmanın mərkəzi şəhərlərdə daha çox olması təbiidir:
“Çünki mərkəzi şəhərlərdə həyat daha qaynar və dəyişkəndir. İnformasiya bolluğu da bu məsələdə xüsusi önəm daşıyır. Əvvəllər qadınların 60-70 faizi ali təhsilsiz idi. Buna görə də qadınların böyük əksəriyyəti, hətta ali təhsillilərin bəziləri də ancaq evdarlıq edirdilər. Onlar üçün də başlıca vəzifə sədaqətli həyat yoldaşı və fədəkar ana olmaq idi.Lakin zaman keçdikcə ali təhsilli qadınların sayı çoxaldı. Həm ali təhsil, həm dəyişən baxışlar, həm də informasiya bolluğu qadınların çoxunda belə bir rəy yaratdı ki, “öz ayağım üstə dayana bilirimsə, kimlərinsə ağız qoxusunu niyə iyləməliyəm?”
İndiki qadınların çoxu həyat yoldaşına yemək bişirməyi, hətta onun paltarını yumağı belə qəbul edə bilmir.
Hesab edir ki, əgər hər iki tərəf bərabər hüquqa malikdirsə, o zaman ev işləri də tərəflər arasında bərabər bölünməlidir. Digər bir problemsə qadının ali təhsilli olmasıdır.
Əgər qadın ali, kişi isə orta təhsillidirsə, o zaman o ailənin ömrü uzun ola bilməz. Bu gün ali təhsili və yüksək gəliri olmayan kişilər özlərinə uyğun həyat yoldaşı tapmaqda çətinlik çəkir. Qadınların isə maddi müstəqilliyi tək yaşamağı asanlaşdırır. İri şəhərlərdə də qadınların iş tapması xeyli asandır. Ona görə də Abşeron yarımadasında boşanma faizi regionlarla müqyisədə xeyli yüksəkdir”.
