"Rüb tətili həm şagirdin, həm də müəllimin istirahəti üçündür" - Ekspertdən ÇAĞIRIŞ
"Rüb tətili həm şagirdin, həm də müəllimin istirahəti üçündür" - Ekspertdən ÇAĞIRIŞ
"Məktəblərdə şagirdlərə dərs olmayan müddətin adı tətildir. Yəni uşaqlar istirahət etməli, tətilə çıxmalıdırlar. Çünki orta ümumi təhsil məktəbində şagirdlər onsuz da kifayət qədər yüklənirlər. Çantalar o qədər ağır olur ki, xüsusilə aşağı sinif şagirdləri onu özləri daşıya bilmirlər, valideynlər kömək etməli olur. Dərs kitabları, tapşırıqlar, sinif testləri, dəftərlər bunların hamısı bir yerə toplandıqda çantanın çəkisi ciddi şəkildə artır və bu da şagirdlərdə, xüsusilə də yükü daşıdıqdan sonra, skolyoz kimi müxtəlif problemlərin yaranmasına səbəb olur".
AzTehsil.com xəbər verir ki, bu fikirləri açıqlamasında təhsil eksperti Ramin Nurəliyev tətil müddətində şagirdlərin istirahət etməsinin vacibliyindən danışarkən bildirdi.
Mütəxəssis hesab edir ki, tətil ərəfəsində uşaqlara yalnız yüngül tapşırıq vermək olar:
"Yəni ciddi, ağır tapşırıqlara ehtiyac yoxdur. Sadəcə hər fənn üzrə elə bir yüngül tapşırıq verilə bilər ki, uşaq gün ərzində maksimum bir saat dərsi ilə məşğul olsun. Mən çoxlu tapşırıq verilməsinin qəti tərəfdarı deyiləm. Çünki tətildən sonra tədris prosesi yenidən intensiv şəkildə başlayacaq və uşaq buna hazır olmaq üçün istirahət etməlidir. Bir az dincəlməlidir ki, növbəti rübdə dərsləri enerjili şəkildə davam etdirə bilsin, yeni mövzuları daha rahat mənimsəsin. Ona görə də hesab edirəm ki, çoxlu tapşırıq verilməməlidir. Nə də olsa, bu 3-4 günün adı tətildir, uşaq istirahət etməlidir. Tapşırıq veriləcəksə də, çox az və yormayacaq səviyyədə olmalıdır. Beynəlxalq təcrübəyə nəzər saldıqda görürük ki, inkişaf etmiş ölkələrin təhsil sistemlərində rüb tətilləri zamanı şagirdlərə klassik formada dərs tapşırıqları verilmir. Onlara layihə tapşırıqları təqdim olunur. Məsələn, biologiya fənnidir, kimyadır, informatika və ya rəsm fənnidir, bunlara konkret bir layihə verilir. Şagird həmin layihə üzərində 3-4 gün ərzində çalışır və tətildən sonra müəllimə təqdim edir. Bu, həm maraqlı olur, həm də uşağı yormur".
Ekspert hesab edir ki, testlər, suallar, ağır yazılı tapşırıqlar, əzbərlər kimi tapşırıqların tətillərdə verilməsi doğru deyil.
"Bizdə bu sistem hələ tam oturuşmasa da, bəzi fənlər üzrə layihə tipli tapşırıqlar vermək mümkündür. Məsələn, informatika fənnində, yaxud müəyyən dəqiq fənlərdə, hətta iki ədibin yaradıcılığını müqayisə etmək kimi tapşırıqlarda bunu tətbiq etmək olar. Əsas olan odur ki, tapşırıqlar uşağın beynini yormasın. Uşaq həm istirahət etsin, həm də əyləncəli bir işlə məşğul olaraq tətili səmərəli keçirsin. Onsuz da təhsil haqqında qanunda da qeyd olunur ki, rüb tətili həm şagirdin, həm də müəllimin istirahəti üçündür. Yəni bu müddətdə enerji toplanmalı, növbəti tədris prosesinə tam güclə başlamaq üçün şərait yaranmalıdır. Layihə tipli tapşırıqlar isə bu baxımdan heç bir problem yaratmır, əksinə, uşaq üçün maraqlı və motivasiyaedici olur", - deyə Ramin Nurəliyev yekunlaşdırıb.
