LDU-da tyutor kurslarının bu ilki nəticələri sevindirici oldu-10 nəfər LDU-da işləmək imkanı qazandı!

LDU-da ötən il əsası qoyulan ənənə bu il də uğurla davam etdirildi. Müasir tədris prosesinin nizamlanmasında vacib halqalarından biri sayılan tyutorlarlarla (akademik məsləhətçi) artıq bu tədris ocağı özünü təmin etmək imkanı qazandı.Qeyd edək ki, LDU-nun tyutorlara olan ehtiyacını ödəmək məqsədi ilə ötən ildən başlayaraq ali məktəblərdə tyutor vəzifəsində çalışmaq istəyən magistr dərəcəli məzunlar və magistraturanın sonuncu tədris ili tələbələri üçün universitetin özündə kurslar təşkil olunur.

Bu gün həmin kursları uğurla bitirən bu ilki məzunlarla görüş keçirilib.Görüşü LDU-nun rektoru vəzifəsini icra edən riyaziyyat üzrə elmlər doktoru,professor Natiq İbrahimov açıb. Görüş iştirakçılarını salamlayan professor Natiq İbrahimov onları təbrik edərək qazandıqları uğurlardan məmnunluğunu ifadə edib və sevinclərinə şərik olduğunu bildirib.Rektor müasir təhsil sistemində tyutorların işinin vacibliyini önə çəkərək onları tədris prosesinin səmərəliliyinin artırılmasında professor-müəllim heyətinə yardımçı olmağa,universitetin uğurlarının daha da artırılmasında fəal iştiraka çağırıb.

LDU-da tədrisin təşkili və təlim texnologiyaları üzrə prorektor vəzifəsini icra edən dosent İdrak Əsgərov məlumat verərək bildirib ki,bu ilki tyutor kurslarına 43 nəfər sənəd verib və onlardan 21 nəfəri müsabiqədən uğurla keçib, təlim kurslarının sonunda 12 nəfər müsbət nəticə qazanıb.Onların içərisində ən yaxşı nəticə əldə edən 10 nəfər olub.

Kursları müvəffəqiyyətlə bitirənlərə sertifikatlar təntənəli şəkildə təqdim olunub.Professor Natiq İbrahimovun bu ilki müdavimlərin hamısının LDU-da,Lənkəran və Astara pedaqoji kolleclərində işlə təmin olunacağı xəbərini gənclər sevinclə qarşılayıblar.

Sertifikatları universitetin rektoru Natiq İbrahimov, dosent İdrak Əsgərov,Lənkəran Dövlət Humanitar Kollecinin direktoru Ruslan Həmidov,Astara Pedaqoji Kollecinin direktoru Ağababa İbrahimov təqdim ediblər.

Yeni işə qəbul olunan tyutorların minnətdarlığını Leyla İbrahimova ifadə edərək, kurslarda məşğələlərin keyfiyyətli təşkilinə və işlə təmin olunmalarına görə rektor Natiq İbrahimova və təlimçilərə təşəkkür edib.

Sonda xatirə şəkilləri çəkilib.Xatırladaq ki,tyutor kursları müdavimlər üçün pulsuz-universitetin hesabına təşkil olunub.

Esmira İsmayılova

LDU-nun mətbuat xidmətinin rəhbəri .