"Məktəblərdə hər bir şagirdin dilinə diqqət yetirilməlidir"
Mətbuat Şurasının sədr müavini Səadət Məmmədova deyib ki, ana dilimizdəki problemlərin, dil pozuntularının əsas səbəbi orta məktəbdə tədrisdir.
Həqiqətən də bütün problemlər orta məktəbdənmi başlayır? Bu problemin aradan qaldırılması üçün hansı tədbirlər görülməlidir?
AzTehsil.com- n əldə etdiyi məlumata görə, Milli Məclisin deputatı Ceyhun Məmmədov bildirdi ki, bu məsələdə məsuliyyəti yalnız bir qurumun və ya strukturun üzərinə qoymaq doğru olmaz:
"Əgər biz bir-birimizi ittiham etməyə başlasaq və günahı yalnız mətbuata, media qurumlarına atsaq, heç bir nəticəyə nail ola bilməyəcəyik. Bu cür polemikalara və müzakirələrə sağlam yanaşma hesab etmirəm. Mənim fikrimcə, burada hamımız məsuliyyət daşıyırıq. Əvvəlcə, hər birimiz danışarkən, sözlərimizdə, dilimizdə və danışığımızda mütləq şəkildə ana dilimizin qaydalarına riayət etməliyik. Bu məsələnin həlli ilk növbədə məktəblərdə başlamalıdır. Məktəblərimiz bu məsələyə çox ciddi yanaşmalıdır və hər bir şagirdin dilinə diqqət yetirilməlidir".
Deputat vurğuladı ki, ana dilimizin qorunması məktəblilərimizin gündəmində prioritet məsələ olmalıdır.
"Media bu məsələdə çox diqqətli olmalıdır. Televiziya aparıcılarının, jurnalistlərin danışıq tərzi, işlədikləri ifadələr və ləhcə seçimləri vacibdir. Media qurumları hər zaman bu sahədə etikaya, düzgünlüklə yanaşmalı və dilin saflığını qorumağa səy göstərməlidir. Universitetlərimiz də bu məsələdə öz üzərinə düşəni etməli və tələbələrlə sıx əməkdaşlıq aparmalıdırlar. Tələbələrə ana dilinin saflığını və təmizliyini qorumağın nə qədər vacib olduğunu anlatmalıdırlar. Elmi cəmiyyətin üzərinə də böyük bir məsuliyyət düşür. Akademik institutlar və tədqiqat mərkəzləri bu məsələyə xüsusi diqqət göstərməli və elmi dairələrdə bu məsələyə münasibəti yüksək tutmalıdırlar. Bu məsələdə hər kəsin üzərinə düşən məsuliyyət var və hər birimiz bu mesajdan öz payımızı götürməliyik. Prezidentin çıxışından, yanaşmalarından və fikirlərindən doğru nəticələr çıxarmalıyıq", - deyə Ceyhun Məmmədov yekunlaşdırdı.
