"Saxta alimlər elmin idarə edilməsində həqiqi alimlərin yerini tuturlar"
"Alimin əməyi dəyər yaratmalıdır. Elmi nəticələr zamanın yox edə bilməyəcəyi dəyərə malikdir. Əgər alimin əməyi elmi dəyər yaradırsa o, həqiqi alimdir, yox əgər yaratmırsa, deməli, o alim deyil, psevda (saxta) alimdir".
AzTehsil.com xəbər verir ki, bu fikirləri Milli Məclisin Elm və təhsil komissiyasının keçmiş sədri, təhsil eksperti, professor Şahlar Əsgərov özünün feysbuk hesabında yazıb.
"Dəyərləri öyrənən elm aksiologiya adlanır. Bizim cəmiyyətdə fəlsəfənin bu bölməsi öyrənilmədiyindən istənilən dəyərsiz və saxta elmi nəticə cəmiyyətə həqiqi elmi nəticə kimi sırınır. Nəticədə bu saxta müəlliflər alim, professor, akademik titullarına sahib olaraq cəmiyyətin inkişafın zəiflədirlər, elmi hörmətdən salırlar.
Sovetlər zamanında cəmi 7 nəfər alim (İ. Kurçatov, A. Saxarov, Y.Xariton və dıg) 3 dəfə Sosialist Əməyi Qəhramanı adına layiq görülmüşdü. Onlar həm də SSRİ EA-na akademik seçilmişdilər. Elmə verdiklərə töhvələrə görə onlar bu zirvəyə qalxa bilmişdilər. Bu alimlərin labaratoriyalarında atom və onun nüvəsi dərindən öyrənilmış və atom enerjisi praktiki həyatda tətbiq edilmişdir. Nəticədə dövlət çox güclü silah və tükənməz enerji mənbəyinə sahib olmuşdur.
İstənilən cəmiyyətdə saxta alimlər həqiqi alimlərdən çox olanda onlar elmin idarə edilməsində həqiqi alimlərin yerini tuturlar. Belə olanda elm inkişaf edə bilmir. Bu deyilənlər həm də mədəniyyətə aiddir", - deyə o, qeyd edib.
