"Süni intellektin inkişafı...."- Rektor
“Hazırda dünya sürətlə dəyişir və bu dəyişikliklərin ən çox hiss olunduğu sahələrdən biri əmək bazarıdır. Süni intellektin inkişafı ilə bağlı narahatlıqlar cəmiyyətlərdə yeni çağırışlar yaradıb”.
AzTehsil.com xəbər verir ki, bunu Macarıstanın Obuda Universitetinin rektoru Levente Kovak Bakıda keçirilən Avrasiya Universitetləri Sammitində səsləndirib.
Rektor qeyd edib ki, universitetlərin missiyası təkcə gəncləri hazırlamaqla məhdudlaşmır, həm də elmi əsaslı yanaşmalar formalaşdırmaq, texnoloji tərəqqiyə etimadı gücləndirməkdir:
“Bir əsr əvvəl avtomobillər ilk dəfə meydana çıxanda insanlar onların atı əvəz etməyəcəyinə inanırdılar. Lakin zaman keçdikcə texnologiyaya etimad artdı və həyatın ayrılmaz hissəsinə çevrildi. Bu gün də süni intellektlə bağlı eyni proses müşahidə olunur. İnsanlarda qorxular olsa da, universitetlərin vəzifəsi cəmiyyətə aydın, elmi və rasional cavablar verməkdir”, – Kovak vurğulayıb.
Onun sözlərinə görə, universitetlər yalnız milli miqyasda deyil, beynəlxalq əməkdaşlıq müstəvisində də fəallıq göstərməlidirlər:
“Çünki süni intellekt və digər innovativ texnologiyalar qlobal miqyasda təsir gücünə malikdir və təhsil müəssisələrinin birgə fəaliyyəti bu təsirlərin müsbət nəticələrini artırmaq üçün vacibdir”.
