KOLLECLƏRƏ kütləvi axın yoxdur - EKSPERT
Bildiyimiz kimi, bu il universitetlərə qəbul ballarında artım müşahidə olunub.
Eyni tendensiya kolleclərə qəbulda da özünü göstərəcəkmi? Ümumiyyətlə, kolleclərə qəbul ballarında artım gözlənilirmi?
AzTehsil.com- n əldə etdiyi məlumata görə mövzu ilə bağlı açıqlamasında təhsil eksperti Kamran Əsədov bildirdi ki, bu il qəbul prosesində ali təhsil üzrə bəzi ixtisaslarda bal artımı müşahidə olunsa da, eyni vəziyyət kolleclərə aid deyil:
"Səbəb çox sadədir: ali məktəblərlə müqayisədə kolleclərdə plan yerlərinin sayı artırılıb. Statistika göstərir ki, ötən il kolleclərə qəbul üçün təxminən 18 min plan yeri ayrılmışdısa, bu il rəqəm 20 minə yaxınlaşıb, yəni əlavə 2 min yer açılıb. Deməli, təklif (yer sayı) artdığı halda, tələb (müraciət edənlərin sayı) əvvəlki səviyyədə qalıb. Bu isə bal artımına səbəb deyil, əksinə, rəqabəti nisbətən yumşaldır. Digər tərəfdən, abituriyentlərin böyük qismi ali məktəblərə üz tutur və yalnız qəbul ola bilmədikdə kolleclərə yönəlirlər. Bu il ali təhsildə 88 mindən çox abituriyent iştirak edib, onlardan 57 mindən çoxu qəbul olunub. Qalan kəsim bir hissə olaraq kolleclərə yönəlsə də, plan yerlərinin artması balansı qoruyur".
Ekspert qeyd etdi ki, kolleclərə kütləvi axın yoxdur, çünki gənclərin əsas arzusu universitetdir.
"Bu faktlar göstərir ki, kolleclərdə ciddi bal artımı gözlənilmir. Əksinə, bəzi ixtisaslarda yerlərin dolmaması da mümkündür. Çünki peşə təhsilinə maraq hələ də zəifdir, imic problemi qalır, valideynlər və abituriyentlər kolleci universitetə alternativ yox, son variant kimi görürlər. Plan yerlərinin artırılması isə rəqabəti azaldır və nəticə etibarilə keçid ballarını aşağı saxlayır. Yəni bu il kolleclərə qəbul zamanı bal artımı müşahidə olunmayacaq. Əksinə, bəzi ixtisaslarda yerlər boş qala bilər. Bu da göstərir ki, Elm və Təhsil Nazirliyi hələ də peşə təhsilinin cazibəsini artırmaq üçün ciddi maarifləndirmə aparmır, proqnoz və plan təqdim etmir. Ona görə də rəqəmlər şişir, amma real maraq zəif qalır", - deyə Kamran Əsədov yekunlaşdırıb.
