Konfutsi İnstitutunun nümayəndələri Tolerantlıq Evini ziyarət ediblər
Azərbaycan Dillər Universitetinin nəzdində fəaliyyət göstərən Konfutsi İnstitutunun ölkəmiz tərəfdən direktoru Rafiq Abbasov, institutun Çin tərəfdən direktoru xanım Li Jihua və institutun müəllimləri Tolerantlıq Evində olublar.
AzTehsil.com- n əldə etdiyi məlumata görə Universitetdən bildiriblər ki, görüş zamanı Tolerantlıq Evinin direktor müavini Ülkər Əliyeva Evin yaradılması, əsas fəaliyyət istiqamətləri və həyata keçirilən layihələr haqqında ətraflı məlumat verib, Azərbaycanın Birinci vitse-prezidenti Mehriban Əliyevanın təşəbbüsü ilə ərsəyə gəlmiş, Qafqaz Müsəlmanları İdarəsinin nəzdində fəaliyyət göstərən Tolerantlıq Evinin ölkəmizdə mövcud olan tolerant dəyərlərin, müxtəlif dinlər arasında qarşılıqlı hörmət və harmoniyanın təbliği baxımından mühüm əhəmiyyət daşıdığını diqqətə çatdırıb.
Konfutsi İnstitutunun əməkdaşları Tolerantlıq Evinin konsepsiyası, fəaliyyətinin məzmunu və müxtəlif icmalar arasında dialoqun və birgəyaşayış ənənələrinin təşviqində oynadığı rola xüsusi maraqla yanaşıblar.
Rafiq Abbasov müzakirələr zamanı Konfutsi İnstitutunun təhsil və mədəniyyət sahələrindəki strateji hədəfləri ilə Tolerantlıq Evinin missiyasının uyğunluğuna diqqət çəkib. Tərəflər Tolerantlıq Evi ilə bu istiqamətdə birgə layihələrin həyata keçirilməsi imkanlarını dəyərləndiriblər. Tolerantlıq Evi ilə Konfutsi İnstitutu arasında gələcək əməkdaşlıq modelləri, ortaq elmi-mədəni proqramların təşkili, gənclər və tələbələr üçün mübadilə formatlarının işlənməsi, həmçinin tolerantlıq dəyərlərinin təbliği ilə bağlı təşəbbüslərin həyata keçirilməsi barədə fikir mübadiləsi aparılıb.
Xanım Li Jihua Azərbaycanın tolerantlıq siyasəti və bu sahədə təcrübəsini yüksək qiymətləndirib, Tolerantlıq Evində qarşılaşdığı mənəvi rahatlıq atmosferinin Azərbaycandakı sülh və sabitliyin bir təzahürü olduğunu vurğulayıb.
Sonda Tolerantlıq Evinin fəaliyyəti yüksək dəyərləndirilib, gələcək əməkdaşlığın hər iki tərəf üçün faydalı olacağı qeyd edilib.
