Xəbərlər
03 iyul 2017
3 459
"Yay məktəbi" Bakıda 18 ümumtəhsil məktəbini əhatə edəcək
Bakı şəhəri 276 nömrəli tam orta məktəbdə "Məktəblinin dostu" layihəsi çərçivəsində "Yay məktəbi"nin açılışı olub.
Aztehsil.com-un APA-ya istinadən xəbərinə görə, tədbirdə təhsil nazirinin müavini Firudin Qurbanov, Bakı Şəhəri üzrə Təhsil İdarəsinin əməkdaşları, millət vəkilləri və başqa şəxslər iştirak edib.
Nazir müavini bildirib ki, "Yay məktəbi" Bakıda 18 ümumtəhsil məktəbini əhatə edəcək. Onun sözlərinə görə, "Yay məktəbi" zamanı 1000-dən çox şagird üçün təlim, seminar və informativ sessiyalar keçiriləcək, müxtəlif idman yarışları təşkil olunacaq: "Məktəb iki mərhələdə - 3 - 28 iyulda layihəyə daxil olan 18 məktəbin 5 və 6-cı, 1 - 31 avqustda isə 7 və 8-ci sinif şagirdləri üçün təşkil ediləcək".
Qeyd edək ki, "Məktəblinin dostu" pilot layihəsi Təhsil Nazirliyi və Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin birgə tərəfdaşlığı ilə Bakıdakı 30 ümumtəhsil müəssisəsində həyata keçirilir.
