Bu məktəblərdə Azərbaycan dili necə tədris olunur?
"Şimal bölgəsinin 5 rayonunda - Qusar, Quba, Xaçmaz, Şabran və Siyəzən rayonlarında tədrisi tam rus, eyni zamanda həm Azərbaycan, həm də rus dilində olan 31 məktəb var. Həmin məktəblərdə 53 nəfər Azərbaycan dili və ədəbiyyatı müəllimi 8593 şagirdə dövlət dilini öyrədir".
AzTehsil.com - əldə etdiyi məlumata əsasən sorğuya cavab olaraq Quba-Xaçmaz Regional Təhsil İdarəsi rəisinin 1-ci müavini Pərvin Ağasiyev verib.
Onun sözlərinə görə həm rus, həm də Azərbaycan dillərində olan 31 təhsil ocağında Azərbaycanın dövlət dili proqram üzrə tədris edilir.
Belə ki, ibtidai və 9-11-ci siniflərdə həftədə 2 saat , 5-8-ci siniflərdə isə 3 saat Azərbaycan dili fənni keçirilir.
Qurum rəsmisinin məlumatına görə qarışıq tədrisi olan məktəblərdə 9 ixtisaslı Azərbaycan dili və ədəbiyyatı müəllimi yeri boşdur. Həmin vakant yerlər 2-ci iş yeri kimi digər müəssisələrdən müəllimlə təmin olunur.
Pərvin Ağasiyev bu məktəblərdən əlavə, bölgənin tədrisi Azərbaycan dilində aparılan 366 məktəbdə də Azərbaycanın dövlət dilinin tədris olunduğunu deyib.
