Lisey imtahanlarında nə baş verib, nəticələr niyə ləğv olunub?
Lisey və gimnaziyalara keçirilən mərkəzləşdirilmiş qəbul imtahanlarının cavablarına əsasən 289 şagirdin nəticəsi ləğv olunub. Bu isə bir çox valideynlər tərəfindən etirazla qarşılanıb.
AzTehsil.com xəbər verir ki, mövzu ilə bağlı fikirlərini redaktor.az ilə bölüşən təhsil eksperti Elnur Hacıyev bildirdi ki, ümumiyyətlə, lisey və gimnaziyalara qəbul qaydalarının çətin olması normal haldır. Onun sözlərinə görə, valideynlər bu qaydalara nə qədər təzyiq göstərsələr də, bu, reallığı dəyişmir:
"Əgər imtahan zamanı qaydaların pozulması halları müşahidə olunursa, burada artıq hər iki tərəfin – həm köçürənin, həm də köçürməyə şərait yaradanın məsuliyyəti var. Bu isə o deməkdir ki, imtahanın qaydaları və tələbləri dəqiq və düzgün müəyyənləşdirilməli, nəzarət isə ciddi şəkildə təmin olunmalıdır ki, bu cür halların qarşısı alınsın. Əgər imtahan nəticəsində kəsilənlər varsa, bu da təbiidir. Axı liseylərə hər kəs qəbul edilməməlidir. Lisey və gimnaziyalar istedadlı şagirdlərin inkişafı üçün nəzərdə tutulmuş təhsil müəssisələridir. Burada rəqabətin yüksək olması və qəbul balının da yüksək müəyyənləşdirilməsi tamamilə məntiqlidir. Bu səbəbdən, kəsilənlərin sayının çox olması da qəbulediləndir".Müsahibimiz qeyd etdi ki, imtahan zamanı qayda pozuntusu müşahidə olunursa, bu zaman məsuliyyət yalnız köçürən şagirdin deyil, həm də ona köçürmək imkanı yaradan şəxslərin, o cümlədən nəzarətçilərin üzərinə düşür.
"Bu isə onu göstərir ki, imtahanlarda buraxılan səhvlər araşdırılmalı, təhlil edilməli və növbəti illərdə onların təkrarlanmaması üçün lazımi tədbirlər görülməlidir. Məsələn, nə qədər şagird qayda pozuntusuna görə kənarlaşdırılıb? Bu hadisələr hansı zallarda baş verib? Həmin zallarda kim nəzarətçi olub? Yəni səhv nədən qaynaqlanıb ki, gələcəkdə bu halların qarşısı alınsın? Digər tərəfdən, burada həm valideynlərin, həm də şagirdlərin maarifləndirilməsi zəruridir. Çünki əgər bir uşaq liseyə köçürmə ilə daxil olursa, o, gələcəkdə liseyin ağır tədris proqramına uyğunlaşa bilməyəcək. Reallıq da bunu göstərir ki, kim liseyə aşağı balla və ya hansısa vasitə ilə daxil olur, o, proqramın ağırlığına tab gətirə bilmir. Liseylər istedadlı və qabiliyyətli şagirdlərin oxumalı olduğu təhsil müəssisələridir. Burada yüksək rəqabət mühiti, çətin qəbul imtahanları və yüksək keçid balları tamamilə məntiqlidir və bu, təhsilin keyfiyyəti baxımından müsbət haldır", - deyə Elnur Hacıyev bildirib.
