Özəl bağçalarla bağlı müqavilələr niyə yenilənmir? - RƏSMİ CAVAB
Özəl uşaq bağçalarında ötən il bağlanmış müqavilələrin indiyədək yenilənməməsi bir sıra valideynlərin narazılığına səbəb olub.
AzTehsil.com - n əldə etdiyi məlumata görə daxil olan müraciətdə qeyd edilir ki, dövlət bağçalarında 2025-2026-cı tədris ili üçün nəzərdə tutulan müqavilələrin müddəti artıq uzadılıb. Lakin eyni vəziyyət özəl bağçalarda müşahidə olunmur.
"Özəl bağçalarda hələ də heç bir addım atılmayıb. Müqavilələrin vaxtının nə zaman uzadılacağı barədə məlumat verilmir. Bu səbəbdən mən övladımı yaşadığım ünvandan daha uzaqda yerləşən digər bir bağçaya aparmalı oluram. Çünki hələ də dəqiq bilinmir ki, əvvəlki bağça ilə yenidən müqavilə bağlanacaq, ya yox", - deyə narazı valideyn müraciətində bildirib.Bu suala cavab olaraq, cavab olaraq Elm və Təhsil Nazirliyinin İctimaiyyətlə əlaqələr və kommunikasiya şöbəsindən bildirilib ki, hazırda nazirlik tərəfindən özəl məktəbəqədər təhsil müəssisələri üçün 2025-ci il üzrə qrant müsabiqəsinin keçirilməsi planlaşdırılır.
"Lakin müsabiqənin keçirilməsinə hələ başlanılmadığı və onun qalibləri müəyyən edilmədiyi üçün bu mərhələdə konkret olaraq hansı özəl məktəbəqədər təhsil müəssisələri ilə əməkdaşlığın davam etdiriləcəyi barədə əvvəlcədən məlumat vermək mümkün deyil. Bu səbəbdən, hazırda mövcud olan müqavilələrin avtomatik uzadılması mümkün deyil və bütün qərarlar yalnız müsabiqənin nəticələrinə əsasən veriləcək", - deyə məlumatda vurğulanıb.
