Xəbərlər / Abituriyent / Bakalavr / Magistr
17 iyun 2017
6 234
Təhsil Nazirliyindən ÖNƏMLİ qərar: “Sonuncu kurs oğlan tələbələrinin kəsr problemi həll ediləcək”
İyunun 16-da Təhsil Nazirliyində "Ali təhsil müəssisələrinin bakalavriat və magistratura səviyyələrində və Azərbaycan Milli Elmlər Akademiyasının magistratura səviyyəsində kredit sistemi ilə tədrisin təşkili Qaydaları”nın təsdiq edilməsi haqqında” Nazirlər Kabinetinin 2013-cü il 24 dekabr tarixli qərarında dəyişikliklər edilməsi ilə bağlı mətbuat konfransı keçirilib.
Bu ildən ali məktəblərdə 1 və ya 2 akademik borcu olan oğlan tələbələrin hərbi xidmətlə bağlı yaranan problemləri həll olunacaq.
Təhsil Nazirliyinin aparat rəhbərinin müavini, Elm, ali və orta ixtisas təhsili şöbəsinin müdiri Yaqub Piriyev bildirib ki, əvvəllər oğlan tələbələrin tədris müddətində akademik borcları qalırdısa, onlar həmin borcu hərbi xidmətdən sonra vermək məcburiyyətində qalırdı.
Onun sözlərinə görə, artıq oğlan tələbələr yeni qaydalara əsasən imtahan sessiyası başa çatandan sonra 1-2 fənn üzrə akademik borcunu ödəyib əsgərliyə gedə biləcəklər: "5 iyula kimi ali məktəblərdə sessiyalar davam edir. Həmin tələbələrə imkan yaradılacaq ki, akademik borclarını ləğv etsinlər. Lakin bu, yalnız 1 və ya 2 akademik borcu olanlara aiddir. Bundan sonra tələbələrə imkan yaradılacaq ki, dövlət imtahanı versin, buraxılış işlərini müdafiə etsin, akademik borclarını ləğv edib hərbi xidmətə yollansın”.
Nazirlik rəsmisi qeyd edib ki, bu gün nazirlikdə prorektorların iştirakı ilə iclas keçiriləcək və müvafiq göstəriş veriləcək.
Y. Piriyevin sözlərinə görə, bu gün IV kursu bitirən 2000-ə yaxın tələbə var. Aparılan araşdırmalara görə, ali təhsil müəssisəsini bitirənlərin təxminən 6%-nin 1 və ya 2 akademik borcu var.
